Sorkarin Zirtirtu 1,507 la thar
Lunglei 7.4.2025: Vawiin atang hian zirna School tam zawk an tan dawn ta. Tun sorkarah zirtirtu 1,507 lak thar a ni a, an zinga mi 526 chuan an hna an zawm lo niin School Edn dept hotute'n an sawi. Zirtirtu hi sorkar sikul atan 1,188 lak thar a ni a, Samagra School-ah 319 lak thar a ni bawk a. Zirtirtu lakte hi Primary school zirtirtu 461, Middle School zirtirtu 348, High School zirtirtu 457 leh Higher secondary school zirtirtu 241 te an ni. Hna zawm ta lo te aiawhtu tur hian Middle School leh High School-ah panel list atanga hnawh khah zel a ni a. Primary School hian Panel an neih loh avangin zirtirtu 234 lak that tum mek a ni, an ti a. Hetih lai hian kum 2024 chhung khan zirtirtu pension 20 leh thi 158 an awm a
ni. Mizoram chhunga High School awm zawng zawngah Zirtirtu 4,134 leh naupang 37,815 an awm a ni.
April 25-ah Ramri chung chang in be leh dawn.
Mizoram leh Assam ramri buai chingfel tuma state pahnih official-te Guwahati a an inbiak hun atan April ni 25 ruat a ni. Home minister Pu K. Sapdanga chuan Assam sorkar lamin April ni 25-a state pahnih official te ramri buai chungchang sawi tura an rawn rawtna chu a thuphunga pawm a ni a. An tum dan chuan April ni 24-ah Aizawl chhuahsanin a tukah Guwahati khawpui-ah an inbe dawn
a ni. Home dept hotute chuan tunge Mizoram ai-awha kal turte tih hi tih chian fak a la awm loh thu leh an hun hman dan tur pawh rawtna a awm chungin sorkar pawmpuina nghah mek a ni an ti. Nikum Aug 9 a Aizawl a Assam leh Mizoram minister-te inbiakna-ah khan kumin March ni 31 ral hma ngei a Guwahati a inbiak chhunzawm ni se tiin thu dah a ni a. Mahse, Mizoram sorkarin state pahnih ministerte inbiak hma-in official-te inbe phawtin inrem lohna la awmte chingfel hmasa phawt se ti a a rawtna chu Assam sorkarin a chhang lawk lova. Vawi 3 zet lehkha an thawn hnu-ah Assam lam hian state 2 official-te inbiak phawt chu an remti ta a, a hun turah thutlukna an siam tlai avangin tunah hian inbe turin ruahmanna siam a ni ta chauh a ni.
Nikum Aug 9 khan Mizoram aiawh home minister Pu K. Sapdanga kaihhruai leh Assam aiawh an border protection & development minister Pu Atul Bora kaihhruaite chu ramri buai chinfelna atan Aizawl-ah an inbia a. Hetah hian thuchhuah intawm siamin kumin March ni 31 hma-a inbiak chhunzawm ni se an ti a, an tum angin inbiakna an
chhunzawm hman ta lova. State pahnih inkar ramri-ah dinhmun pangngai bak engmah chet thawh lo tura intiamin chu chu bawhchhiat a awm lo ni a thudawn a ni.State pahnih official-te inbiak hnu-ah hian minister te an inbe leh tura ngaih a ni a. An inbiak leh chuan inbiak vawi 5-na tur a ni dawn a. Sorkar hmasa hunlai khan chief minister pahnihte vawi 2 an lo inbe tawh bawk
Kumtlinglo Lirthei khalh strick dawn
Supreme Court Comtt on Road Safety thupek angin kum tling lova lirthei khalhte chik zawka endik turin Transport dept-in DTO te a hriattir. Supreme Court Committee on Road Safety chuan lirthei chetsualna a tlak hniam theih na’na State zawng zawng hnena tih tur leh hmalakna tur a duan hrang hrangte chu Mizoram Transport Minister leh a kaihhnawih dept hrang hrang te nen ngaihtuah ho a ni a. Hetah hian Supreme Court Comtt on Road Safety in a ngaih pawimawh em em kum tlinglo lirthei khalh thin te chungchang ngaihtuah hoin, District Trasport Office (DTO) zawng zawngte chuan kum tling lo lirthei khalh thinte nasa leh chik zawka lo endik thin tur leh dan bawhchhia te chu Motor Vehicle Act, 1988 tlawhchhan a hrem ngei tur leh dan bawhchhia, hremna pek te chu fel taka chhinchhiah thin turin a ti a ni.
He thupek hi March ni 20 khan chhuah a ni a. He mi rual hian zirlaite chuanna school/institution bus a zirlaitehim zawk na’n Mizoram-a zirna in bus ten an phurh theih tawk ai a tam zirlai phurh loh tur tih thuchhuah siamin, dan dinglai angin zirna in bus reng reng chuan an phurh theih zat bus bang chhung leh pawnah an ziak ngei ngei tur a ni a. He thupek hi bus neitu zawng zawngte'n an zawm ngei ngei tur a ni a, thupek zawm lote chu dan anga hremna pek a nih tur thu Transport Dept chuan a sawi a ni
Kangmei vangin mi 4 thi
Nikum, 2024-2025 chhung khan Mizoramah in kang 37 awmin kangmei vangin mi pali an thi. thudawn danin nikum chhung khan in kang hi thla tin a thleng a, March leh April-ah tam zual deuhin in kang report an dawn zawng zawng chu 37 a ni. Nikum chhung vek khan ram kang tum 147 thlengin March thlaah a tm fal hle. Nikum chhung veka kangmeiin thil a tih chhiat hlut zawng hi Rs.
5,69,23,558 a ni a, bungrua hum zat hlut zawng hi Rs. 30,18,89,992 nia chhut a ni.
Nikum chhung khan inner line permit (ILP) pangngai 7,927 pek chhuah a ni a, ILP pek chhuah zinga mi 5,675-te chuan an an ILP hi tinungin pawhsei sak leh an ni.
Rel chawlhhmun awmna Bairabi khuaa ILP pekna atan ruahmanna thar a awm lo a. Amaherawhchu, ILP check point ah mobile application hmanga lo endik thin a ni.
BJP MIZORAM HEADQUARTERS, PRESS RELEASE DATED THE 4TH APRIL 2025 : NO.BJP/MZ/HQR/PR-28
April, 4 2025 hian Friday Political Session chu BJP State Office, Mipui Rûn, Upper Republic-ah neih niin, Pu Malsawmtluanga State General Secretary in inkhawm a kaihruaia a, Dr. K. Beichhua, MLA & State Core Group Member-in thusawina hun a nei a ni.
Dr. K. Beichhua MLA chuan thusawiin, "Kalphung thar Sorkarin mipui Healthcare tia 1st April 2025 aṭanga a kalpui hi Healthcare vanduaithlak tak a ni," a ti.Pu Beichhua chuan, "Government Servant hian Facility an neih zinga Security an neihna bera an ngaih chu Medical Reimbursement an neih hi a ni a, Medical Attendant Rule ah he hamṭhatna hi tun thlengin sawiselna leh lungawilohna engmah awm lovin lawm takin an la enjoy mek a. Chutihlaiin tun Sorkarin Mizoram Universal Health-care Scheme-a Sorkar hnathawkte barluih an ni hi a vanduaithlak takzet a. Hei hi Sorkar hian a rang lama chinfelsak turin ka ngen duh a ni," a ti.
Dr K Beichhua chuan, "Hospital empanelment chungchangah ka hriat danin State pawn lama Hospital Empanelled hi 20 an ni a, chung ho pawh chu deemed Empanelled an ni chauh a, MoU sign pui pakhatmah an awm lo. State chhungah Private Hospital tam tak zingah damdawiin pa 6 chauhin an pawm a, Private Hospital Association te'n an pawm lo thung a ni," a ti.
Dr Beichhua chuan sawi chhunzawmin, "MLA-te pawh Medical Reimbursement ti thei kan ni sa a, tunah hian he Scheme hnuaia thun luh tum mek kan ni a, hei hi kan duh dawn nge dawn lo tih hi ngun taka kan ngaihtuah a ṭûlin ka hria a ni. Tun hnaia Assembly Budget Session neih zawh takah khan Health & Family Welfare Demand Discussion ah khan ka lo sawi tawh a, PM Healthcare (AB-PMJAY) scheme chu Kum 2018 aṭangin India ram mipuite tan min lo duansak tawh a, hemi Scheme kaltlang hian cheng Nuai 5 thleng bill theihna niin mi hnuaihnung zawkte tan min lo siamsak tawh a ni.
He PM Healthcare Scheme hi a ropuiin a chhuanawm takzet a, hei mai bakah hian tunah Senior Citizen Kum 70 chin chunglamte tan a siamsak leh bawk te hi Mipui Sorkar dik tak chu BJP a nih zia a ti lang chiang hle a ni. Tuna Mizoram Sorkarin Mizoram Universal Healthcare Scheme an tihah hian AB-PMJAY hi a laimu ah dahin fuh ti takin a kawr rawng dangin an chei mai mai ang tih a hlauhawm hle, kan lo en ang ka lo tih tawh ang khan, tunah hian Mizoram mipuite chuan kan enchhin ṭan leh mek ta a ni.
Thla hnih-khat hun an kal ang a, AB-PMJAY kawra rawng dang kan lo hnawih Health-care Scheme hi a nihna dik tak a lo lang tawh ang a, Sorkar pawh hian tifuh an intih kher ka ring lovin, buaina namen lo kan tawh ngei ka ring a ni. Chuvangin Sorkar hnathawkte, Private Hospital neitute nen mumal taka sawi hovin harsatna kan tawh hma hian ennawn leh ngei turin ka phut tlat a ni. Chuvangin Mizoram mipui aiawha thlan tlin kan nih angin, mipui ṭhatna turah chuan inphahhniam a ṭul hnunah inphahhniamin, thuneitu zawk kan nih vanga harsatna cho chhuak kher lovin, Stakeholders te nen Dawhkan khat kila mipui tan remna kan zawn a tul takzet a ni," a ti bawk.
Nimin April ni 6 khan vawk pul hri African Swine Fever (ASF) vangin Mizoramah vawk 46 a thi.
Animal husbandry & veterinary department nimin April ni 6 a ASF vanga vawk thi 56 nen hian kumin vawk 1,163 a thi leh tawh a, tun dinhmunah vawk hri hi Siaha, lawngtlai, mamit leh Lunglei dist a a veng / khua 39 ah te ASF hi leng mek a, nimin bika thite hi Siaha a veng 15 huam chhungah vawk 40 a thi a. Lawngtlai khawpui-a veng 2 – Lawngtlai-4 leh Council vengah 2 ve ve an thi a, Mamit district a Zawlnuam khua-ah pahnih a thi bawk. Nimin vek khan hri darh zel tur ven nan asf hri kai vawk 12 suat a ni a, hengte hi Mamit, Siaha leh Lunglei amite an ni.
Central YMA in Ruihhlo tamtak man .
Central YMA hnuaia CADS chuan 29 March - 5 April,'25 chhung khan Heroin No - 4 Hawng 14 leh achanve, Tictac 232, Ganja 2 grams, AP mum 73, Nap- 10 mum 18, Chloro-zepam, mum 10 an man a. Heng kaihhnawiah hian Mihring 115 an man a, mi 30 councelling an pe a, TBCC Home ah 7 an dah a, Police Narco ah 2 an pe a ni.
Lung (heart) Doctor lemin mi 7 a zai hlum.
Madhya Pradesh, Damoh a Kristian Mission Hospital ah lung doctor lem in, mi 15 a enkawl zinga 7 an thi a.He lung doctor lem hi Narendra Vikram-aditya Yadav ani a, United Kingdom a, lung doctor thiam N John- Camm angin a insawi a, a laka complaint thehluh anih hnu ah achin hriat a ni lo.
He lung doctor nia inchhal hian lung lam damlo mi 15 a enkawl zinga 7 chu an thi niin a sawi a,
Damoh Collector, Kochar chuan he thil chhui tur hian special team din a nih thu leh, chhui zawh anih hma chuan hemi chungchang sawi theih anei rih lo tih a sawi.
Complaint thehluttu Lawyer Deepak Tiwari sawi danin he fake doctor hian Damoh a, Mission Hospital ah hian mi 15 a zai a, chung zinga 7 chu an thi a, hemi chungchangah hian february thla khan he doctor rinhlelh anih thu complaint an dawng tih a sawi. Hospital a document te enfiah a ni a, chuta tang chuan he pa hi Narendra Yadav ani tih hmuhchhuah a nia ti. Tiwari chuan he thihna chungchang hi Mission hospital hian police ah an report lo niin a sawi.Hospital hotu ber Ajay- Lal hi tun dinhmunah India ram pawnah a awm a, hospital thawktute chuan he doctor lem hi an hospital ah hian govt- approved- agency kaltlangin a lo lut tih an sawi a, rinhlelh anih chungchang complaint alo luh hian a document te chu thuneitute leh a chhuitute hnenah an thehlut vek tih an sawi.
Dipak Tiwari chuan he doctor lem pa hi a hma in Hyderabad lamah kidnapping case a, thubuai nei tawh anih thu leh a awmna ngaiah rei tak a awm ngai loh thu a sawi.
ZPM Lai District Headquarters Lawngtlai chuan sawhthing chungchangah thuchhuah an siam,
Tun hnaia Social Media-a video thehdarh mek pakhat ; Lawngtlai District-a Rulkual khuaa Sawhthing chingtu mi thenkhatte'n an Sawhthing thar, hralh tum, sawrkarin lei sak duhlo anga thehdarh chu, thudiklo leh belhchian dawllo hmanga mipuite bum tumna a ni, an ti.
ZPM Lai District Headquarters Media Department tem thuchhuah siam an tarlan danin, Rûlkual khuaa Sawhthing chingtu Pu Lalbiakhluta leh Pu Ngaihzuala te chuan an Sawhthing thar chhuahte chu March 19, 2025 khan Society leh Collection Center hriatpuina tello in Horticulture Godown, Lawngtlai Council Vengah hralh turin an thlen a. Amerawhchu, Mizoram Agriculture Marketing Board ruahmanna a March 12, 2025 ah Sawhthing lei run pui thawhkhatna (first phase) chu tih tawp lai lawk a lo nih tawh avang leh, Horticulture Godown pawh khar fel a nih tawh avángin, Rulkual khua atanga an Sawhthing ken te chu godown pawn lamah an dah a, hun engemaw chen a liam hnuah - April 3, 2025 khan Sawhthing neitute chuan la let lehin, he an lak let leh hi mi tute'n emaw sawrkar beihnan remchangah hmangin, diklo takin social media
ah thu an thehdarh ta a ni, an ti a. Lawngtlai District a Sawhthing chingtute chu sawrkar dan siam anga society a inziak lut vek tur leh, a hralhna tur kawnga sawrkar thuchhuak leh ruahmanna siamte ngaipawimawh a, thawktute thu ngaichang thin turin ZPM Lai District Headquarters chuan ngenna an siam bawk
India hmar lamah khawlum azual zel a, state 5 a khawpui 21 ah te chuan khaw lum lai ber celcius degree 42 a thleng a ni.
National capital Delhi ah chuan ni thum chhung chu khawlum ala zual zel dawn niin a lang a, Delhi bakah hian Rajasthan, madhya Pradesh, maharastra, Gujarat leh Odhisha pawh ala lum hle dawn a, met office chuan thli- chak zawng tlahniam chuan, abik takin Delhi ah nghawng a nei niin a sawi.
Rajasthan a Barmer chuan record thar asiam a, nimin pathianni khan khawlum lam hi celcius degree 45.6 ani a, April chawlhkar khat chhunga alum ber tum a ni a, normal aia asanna hi 6.8 degree lai a ni.
Met. departmenrt chuan Gujarat hmun thenkhatah April 6 - 10 chhung hian khua alum hle dawn tih an sawi a, chutiang chuan Rajasthan pawh khawlum zualna turah atel a ni.
No comments:
Post a Comment