ZUNZAM NEWS ( 29.4.2025 )

HSLC Result passed percentage 76.68

Lunglei 29/4/2025: MBSE in result a tih chhuahah pass percentage 76.68 a ni a. nikumah 73.37% a ni. Exam beitu 18946 awmin  nikumah mi 18561 ten exam an bei thung a ni.Nikum ang bawkin kuminah pawh mipa aiin hmeichhia pass an tam zawk.

PC.Lalthakimi KD H/S Aizawl pakhatna niin Mark 479 a hmu a, nikum a pakhatna khan Mark 485 a hmu thung a ni. 

Top 10-ah hian mi 24 an lang a, 6th Position H.Remsangliana s/o H.Lalmuankima, Theiriat  BHSS Serkawn  lang ve in ani tih loh chu Aizawl khawchhung a School atang vek in an ni. 6th position la hi pali an awm a ni. H. Remsangliana hian mark 468 hmu in E, M, Sc, SS, Mz-ah te letter  a hmu a ni.

Pass kim vekna school 107 a awm a, Fail vekna School 13 a awm ve bawk. Fail vekna School-ah hian Lunglei Dist atangin School 5 an awm a,an zingah hian nikum a fail vek tawhna Govt Zohnuai H/S an tel leh a, appear 3 an nei a ni.Zirlai 2 chauh nei Vaisam RMSA Seconday School pawh pass Nil zingah an tel. Daphawka Memorial H/S, Thualthu H/S leh Bualte H/S te pawh Lunglei Dist a Fail vekna school an ni.

“Tun hi tanrual hun a ni, Politics a in chirtheh a hun lo” President, LDCC

Lunglei 29/4/2025:  LDCC President Pu R. Lalnunthara chuan  tuna kan Sorkar hrawn mek a PWD leh PHE Minister te hian Aizawl chauh hi em ni Mizoram an tih, tih mai a awl a,  tuna lungawi lohna lantir a ngaih na chhan pawh hi ATL Road siamna tur pawisa awm sa pawhpen vang a ni. MZP hmalakna hi  kan thlawp tlat a,  tun hi tanrual hun a ni a, Politics a inchirhtheh hun a ni lo, he issue bikah hi chuan Political Party kan ni emaw NGO kan ni emaw kan zavaia tanrual hun a ni a ti. 

He thu hi vawiin a Political Session Congress Bhawan-a neihah sawiin Pu Mathara chuan, Sorkar-in Petrol leh Diesel man a ti sang a, an sawi danin kawng siamna atan an ti a, Vawiin hian eng atan nge an hman tak tih te hi kan zawhna a ni a ti. Tui vanlai khan Lunglei mipuite kan harsa em em a, koh eih chawp ngai Minister kan nei te kha a vanduaithlak takzet a ni a ti.

LDCC President chuan, tunah hian Lungleiah issue lian tak pahnih a awm mek a, chu chu Kawng leh Tui chungchang hi a ni. A ngaihna hria a an insawi ang ngeia heng kan harsatna lian tak te hi a chinfel dan tur dap thuai turin ZPM kaihhruai Sorkar hi kan ngen a ni a ti.   Sawhthing  chingtute an ti  beidawng leh mek a,   rintlak an ni dawn lo tih hi a  chiang hle  a ti. 

Pu Mathara chuan, Mizoram tan hian Development nge pawimawh kan ram leh hnam humhalh tih hi ngaihtuah ila,  kan sakhua, ram leh hnam a him loh chuan kan zavai hian zuah kan ni dawn   lova,  kan tana him lo hi chu  huaisen taka kan hnawl  a ngai a ni a ti.

YMA Sub Hqrs. Lunglei te chuan MZP Lunglei te hmalakna an thlawp thu an puang chhuak ve leh ta.

Vawiina an thuchhuah a an tarlan danin - Aizawl-Thenzawl-Lunglei (ATL) Road siamtu Contractor bân tâk te security deposit leh a interest tling khawm cheng Vbc 90.6948 chu, State Assembly hnuaia Estimate Committee ten Aizawl - Thenzawl - Lunglei (ATL) Road siam nan an rawt tih kan hriat hnuah, Mizoram Chief Minister hnenah Estimate committee te rawtna anga hma min laksak turin YMA Sub-Headquarters, Lunglei chuan ziakin, a hnenah Ni 27.11.2024 khan hmaichhanah kan ngen tawh a. 

Chutih mek lai chuan pawh pên then a niin, Mausen leh Pukpui inkar chauh siam tur a nih thu kan hre ta mai hi pawi kan ti tak zet a. Chuvang chuan, pawt pêng lova Aizawl - Thenzawl - Lunglei (ATL) Road siam nan, he pawisa hi dah let leh turin YMA Sub-Headquarters, Lunglei te chuan PWD Minister hnenah, Ni 9.4.2025 khan ziaka thlenin hmaichhanah kan lo ngen tawh bawk a ni. Kan ngen tawhna te min hriatsak tur leh, tuna MZP ten kawngpui dang chat meuhva an hmalakna hi 'Mizoram Chhim lam mipui aw' a ni tih min hriatsak a, Mizoram sorkar-in kan dilna te a hma thei ang bera min tih hlawhtlinsak turin kan ngen tak meuh a ni. 

He Aizawl - Thenzawl - Lunglei (ATL) Road siam thatna tura NGO hrang hrang ngenna leh hmalaknate hi na zawka nawr ngai tawh lo tura kan sorkar chak tak hian, hma min laksak ngei turin YMA Sub-Headquarters, Lunglei chuan kan ngen tak meuh a ni.