ZUNZAM NEWS ( 30.4.2025)

Lungleia MZP te lungawilohna lantirna chu chhunzawm zel a ni a, Pukpui dai bakah Zobawk lamah lirthei dan ani tawh bawk a, Lirthei tam tak an tangkhang mek.

Lunglei MZP huaihawt  Road Block neih mek nimin atang khan Pukpui dai mai ni lovin Hrangchalkawn paltlanga lut leh chhuak tur lirthei an dang leh a, lirthei tang khang an tam tawh hle a, Motor an dan zingah hian bungraw phur motor lian an  tam hle a ni.

Nimin khan Sub. Hqtrs. YMA Lunglei Emergency Meeting chuan  MZP hmalakna chu Mizoram Chhim lam mipui  aw a ni tih hria a, a hma thei ang bera tih hlawhtlin sak turin sorkar a ngen bawk a. CYLA leh pawl thenkhat pawhin an thlawp thu an puang zel a, pawl hrang hrang 20 vel zetin an thlawp tih an puang tawh niin thu dawn a ni.

Wine siamchhuah leh zawrh chhuah a ni dawn

Agri Minister Pu P.C Vanlalruata’n Mizoram Liquor Prohibition Act 2025 hnuaiah Mizo rilrem zawngin wine siam chhuah leh zawrh kawngah sawrkarin hma an la dawn tih an sawi. He thu hi nimin a National Symposium and Consultative Workshop on Production of Wine From Grapes and Fruits in Mizoram puala hun buatsaih a hmanpui na ah sawiin Minister chuan Mizoram thei chi hrang hrang hmanga wine siam chhuah kawngah hma an sawn hle a ti a, 

Mizoram Liquor Prohibition Act 2025 hnuaiah Mizote ril rem zawngin wine siam chhuah leh zawrh kawng ah sawrkarin hma an lak dawn a ti a, Mizoram ah grape, sapthei, lakhuihthei leh balhla te chu Mizoram boruak leh ram ah tha tak in a to thin tih sawiin tun aia sawngbawl dan tha zawk an ngaihtuah dawn tih a sawi bawk. Nimin a hun hmanah hian wine siam lama mithiam ten wine siam dan bakah Mizorama thei chi hrang hrang thar chhuah hmanga wine siam chhuah dan an zir ho a, Wine siam na hmanrua leh wine hmanga tourist hip dan bakah hralhchhuah dan zir ho a ni bawk.

Lengpui Airport chungchang CM hovin sawiho

Nimin tlai khan Chief Minister Pu Lalduhoma chuan a officeah Airport Authority of India hotute Dr. Sharad Kumar, Member (Operations), Pu M Raja Kishore, Regional Executive Director, NER leh an thawhpuite a kawm a. Lengpui Airport - Airport Authority of India kuta hlan chungchang a sawipui. CM chuan, tun hma atang tawhin AAI kuta Lengpui Airport enkawl hna hlan tuma hmalakna a awm tawh thin a. Keini pawhin kan ngaihven nghal bawk a. Mahse kan beisei angin thil a kal tluang lova, duhthlan tur dang, Mizoram tana tha tawk tak a lo awm bawk si avangin chung mite nena indawr na te chu kan kalpui a ni. Tun hnaiah Union Home Minister Pu Amit Shah nena kan inkawm naah AAI nen a indawrna thar thawh leh tha kan ti a.Ti hian kan han indawr thar leh ta a. AAI lamin Lengpui Airport zirchian na te han nei ula, in thu leh hla a zirin kan kal zel dan tur kan sawiho dawn nia, tiin AAI thuneitute hi a chah a ni. AAI hotute hian Lengpui Airport tih changtlun nghal ngai zual nia an hriat te leh hma an lak zel dan tur te CM hnenah hian an sawi bawk.

Urban Development & Poverty Alleviation (UD&PA) Department hnuaia Lunglei khawpui bawlhhlawh sawngbawlna hmun, din tur chungchangah mipuite ngaihdan lakna vantlang inkhawm (public hearing) buatsaih a ni.

Solid Waste Management Centre (SWMC), Tlabung Road Riangvai Thlanmual bula din tur chungchangah sawrkar laipui aṭanga environmental clearance lakna turin nimin khan Lunglei Convention Centre Conference Hall-ah he project-in a kaihhnawih khua/veng hrang hrang mipuite ngaihdan lakna vantlang inkhawm (public hearing) buatsaih a ni.

Mizoram State Pollution Control Board (MSPCB) huaihawt vantlang inkhawm hi Lunglei District Additional Deputy Commissioner Pi Zoramdini chuan kaihruaiin, vantlang inkhawm chu SWMC din turin a chhehvel boruak leh leilung a nghawng theih dan leh environment tana hma lakna him a awm theih dan tur sawi hona tur a nih thu a sawi.

He hunah hian Lunglei Divisional Forest Officer Pu Lalduhthlana, MSPCB-a Environment Engineer Pi PC Lalmuanpuii leh thawktu dangte, UD&PA leh department dang official-te, project consultant - Eco-Management Services leh Voyants Solution Pvt Ltd ai awhte, he project chhehvela khua/veng hrang hrang khawtlang hruaitu, tlawmngai pawl ai awhte leh project ngaihventu mi ṭhahnem ngaite an kal khawm a. 

Eco-Management Services aṭangin Consultant Dr Lalmuansangi chuan project chungchang leh environment tana him tura zir chianna (environment impact assessment) an kalpui dan a sawi fiah a. Mipuite hnen aṭangin he project kalpui tur chungchanga an ngaih dan leh zawhna leh rawtna an neihte ngaihthlak niin, he project pawimawhna te, environment lama nghawng a neih theih dan tur leh chuti ang harsatna awm thei tihnep leh sut kian a nih theih dan tur te zau taka sawi ho a ni.

Mizoram sawrkar a Persons with Disabilities (PwD) Commissioner Pi Vanlaldiki Sailo hovin Lungleiah vohbikte tana veivah awlsamna ruahman dan endikna nimin khan buatsaih a ni.

He ruahmanna hi Lungleia Deputy Commissioner Office, Civil Hospital Lunglei, Christian Hospital Serkawn, Lunglei Municipal Council Office, Lunglei Government College leh Government Higher Secondary School-ah te vohbikte tana veivah awlsamna ruahman dan endikna nimin khan buatsaih a ni .

He access audit-ah hian vohbikte tana awlsam zawka veihvah theihna turin ramp, lift leh vawnban (handrails) te a awm em tih te, an ṭhutna tur zuahsak an ni em tih te, awlsam zawka an hman theih tur inthiarna (toilet) leh lehkha tar (signage) a awm em tih leh vohbikte'n an mamawh an thlenna tur Grievance Redressal Officer ruat an ni em tih te endik a ni.

PwD Commissioner chuan vohbikte'n awlsam zawka public office leh damdawi in an dawr theih nan leh zirna inah te awlsam zawka an kai ve theih nan dikna leh chanvo an nei tih sawiin, he an chanvo dik tak hi an chan theih nan ṭan lak tlan a ngai a ni, a ti.

Lungleia Access Audit Team te hi Lunglei District Social Welfare Officer Pu C.L. Joseph, PWD (Building) Executive Engineer Er Zodingliana, DC Office Superintendent Pi Lalsiamthari Bawitlung,  Samagra Shiksha Lungleia Assistant Project Officer Pi Lalhmachhuani leh Junior Engineer pathum te'n an ṭawiawm a ni.

Lunglei District-ah hian District Bawrhsap ruahmannain vohbikte chawi kan nan Project LEAP kalpui mek a ni a. Lunglei khawpui chhunga public building, hospital, school leh college-ah te access audit hi neih vek tum a ni.

MNYF ten Burma Kuhva man sa te an tlawh

MNYF Hqrs.Vice President Pu Lalnunmawia Pautu, Ex-MNA President Pu Rochungnunga leh MNF hruaitu thenkhatte chuan thawhtanni khan Saitual Police Station-a Burma Kuhva man sa te an tlawh hnu ah Khawlailung sawhthing dahkhawmna hmun SCC an tlawh.

MNYF te sawi danin Sawhthing chingtute sawhthing thar, 1st phase-a sawrkarin a lei sen loh sawhthing engemaw zât awmin heng sawhthingte hian a rihna a hloh nasat bâkah tawih chhe mai thei dinhmunah a awm mêk a ni tih an han hmuhpui a. 

Tunah hian Khawlailung SCC-ah hian Godown pahnih awmin sawhthing  dahkhawmte hi a chhung a lum vung vung tawh a, a hma aiin a rihna a tlahniam nasa tawh hle bawk a. Heng bakah hian sawhthing SCC godown la thleng lo sawhthing chawh sa leh la chawh loh thahnem tak a la awm bawk a. Hetiang hi an dinhmum a nih avangin sawhthing chingtu mangang tak takte hian sawrkar rate bituk  pawh ngaihtuah thei lovin a lei thei tur a chhâng sâng ber an hmuh ang ang hnenah kg ah ₹12/- in an hralh tawp mai  nia sawiin kut hnathawktu ngai pawimawh inti ZPM sawrkar-in thlai thar lei nâna cheng vaibelchhe tam tak a dah laia sawhthing chingtute dinhmun hetiang mai a la ni hi a lungchhiatthlâk tiin an tarlang a ni.

MNYF chuan Mizoram pumah sawhthing la lei loh nuai 10 chuang zet a la awm laia tun thlenga Mizoram sawrkarin quintal 72,003 vel chauh a la leisak hi  satahchhuak pek ang chauhah an ngai tih sawiin sawhthing quintal nuai 10 chuang a la lei lohte hi engtin nge a tih zel dawn tih an zawt a ni.

BJP Mizoram chuan LADC a BJP Sorkar a pian dawn avangin, Assam Chief Minister Pu Himanta Biswas Sharma hmu in LADC hmasawnna tur leh LADC tana pawimawh te an thlenin, LADC tan chanchin lawm awm an hmu.

BJP thuchhuahin a tarlan danin Pu Delson Notlia MDC, BJP National Minority Morcha Secretary kaihhruaina in, CEM designate BJP MDC Pu N. Zangura leh BJP MDC Pu B.N. Thangpuia te chu Northeast BJP Coordinator sawmna angin, Guwahati a BJP hruaitu pawimawh tak tak te chu hmuin April ni 26 Inrinni khan Assam Chief Minister, NEDA Convener ni bawk Pu Himanta Biswas Sharma chuan office ah lengah sawmin, inkawmna hun ṭha tak annei a. 

LADC BJP MDC te hian LADC tan Guwahati hmun ah, Lai Students Hostels sakna tur ram dilin- Assam Chief Minister chuan Mizorama ADC pathuma BJP kaihhruai sawrkarna vek siam ani thei chu lawm awm atiin, a lawm zia lantir nan a rang lama MADC, CADC leh LADC tan ram pek an nih tur thu hrilhin, tunah pawh a hmun an en mek thu alo hrilh a, LADC BJP hruaitu te hi an lawm hle tih an tarlang.

BJP LADC hruaitu Pu N Zangura leh Pu BN Thangpuia te chuan Sixth Schedule Amendment pawh NEDA Convener anih ang leh NE States a pa ber anih angin- arang lama passed a nih theihna tura, ṭanpuina an dil bawk a, LADC hruqitu ten a an mamawh an dil te chu theihtawpa a lo puih tur thu a sawi a ni.

===============

MPCC Treasurer Dr. Lalmalsawma Nghaka chuan MNF chhungkaw thum a lawmlut.

Nimin khan Lengpui, Hmunpui, Rawpuichhip, Dapchhuah, Damparengpui, West Phaileng, Lallen, Phuldungsei te tlawhin West Phaileng-ah MNF chhungkaw thum Congress party-ah a lawmlut.

Dr. Lalmalsawma Nghaka chuan Congress kan sorkar chhung khan thil tha tam tak tih kan nei a, retheihna ata mi tam tak khaichhuahin an awm a. Kan ram tan rohlu tam tak kan hnutchiat bawk a. Chutihrualin, mipuite beiseiphak tawkloh leh thil tihfuh tawkloh kan neih te pawh kan hria a, chuvangin, kan thiltih fuhloh mipuite beisei kan phak lohnaah te ngaihdam kan dil a ni, a ti.

Tuna kan ram dinhmun en hian a bik takin kuthnathawktute an mangang hle a, Ration buhfai man ZPM sorkarin a tihsan tak avangin chhungkaw tam tak tan harsatna a thleng mek a. Lirtheia eizawngte tan Diesel leh Petrol man sang ringawt pawh hi a pawi hle. Universal Health Care ZPM sorkar duan thar pawh Private Hospital-te barh luih a tum avangin Mizoram chhunga kan Hospital neihte nen an la inhne rem thei lova, Mizoram Doctor tha tak tak tena an din Private Hospital-te tana pawm theih tur Health Care system tha zawk duang a, siam tha leh turin Mizoram sorkar kan ngen a ni, a ti.

Everhome Pro Volleyball League 2025 chu nizan khan LPS Arena Falkland ah tan a ni.

EverHome Pro Volleyball League 2025 tanna inkhel enin LPS Arena-ah a khatin mipui an pung khawm nghal. Tuichangralin MVA Cup final-a an tlawmna chhang letin set an hloh hmasak hnuah TNT chu 20-25, 25-23, 25-21, 25-22 in an hneh a, a vawi khat nan Mizoram inelna sang bera champion thei turin rahbi pawimawh tak an tuk a. Chutih laiin an chak theihna kawnga player pawimawh Rajneesh Singh chuan Uttar Pradesh-ah a hawsan leh nghal dawn a, a lo kir leh ang em tih a chiang rih lo.

Mipa league round hmasa, April 29 atanga May 1, zan thum chhungin a thlawnin a duh apiang tan a hmunah a en theih a; round hnihna May 2 (zirtawpni) zan atangin ticket zawrh chhuah a ni ang.

Zanin dar 8:00 hian mipa team Khawbel leh Hunthar  ten an khel anga, May ni 1 Ningani zanah mipa team bawk Sihphir leh Anastasia Electric Veng ten an khel ang.