Lungsen PHC-ah X-Ray khawl a hman theih loh rei .

Lungsen PHC-ah X-Ray khawl a hman theih loh rei ta hle

Lunglei/Lungsen 30/5/2025: Lungsen PHC -a X-Ray khawl chu hman theih lovin a awm a, hman theih ngei nise tih Lungsen mipui leh a chhehvel khua ten an duh a, thuneitu ten ngaihven se an duh tih kan palai chuan thu a dawng.

Thudawnna in a sawi danin X-Ray khawl hi  kum 2012 chho vel khan , khatihlaia Bialtu Minister Pu Zodintluanga khan  Lungsen PHC Area mipuite mamawhna hriain a pe a.   Kum tam tak Quarter's ruak pakhatah chung khawl pawimawh leh hlu tak si chu a pawimawhna leh a hlutna chhawr theih si lohin dah tawl mai mai a ni .

YMA Lungsen Group rorelna ah pawh he khawl hi hman tangkai dan awm se tiin thuneitu te hnenah pawh thlen a ni  a, mahse tun thlengin awmzia a awm chuang lo. Thudawnna in a sawi danin X-ray khawl hmang turin a enkawltu a awm lo a, X-ray Room tur pawh a awm chuang lo. Lungsen PHC Building sak thar a  nih hnuah pawh X-Ray khawl chuan riahrun fumfe a la chang lova,  “Khawl kan nei a, a enkawltu kan nei lo, a enkawltu a awm hnuah a khawl lah chu hman tlak pawh ni ta manglovin a awm a, mamawhna a sang khawp mai” a ti.