Pi V. Lalhmangaihi'n Florence Nightingale Award a dawng.

Civil Hospital-a Nursing Officer Pi V. Lalhmangaihi chuan vawiin khan President Droupadi Murmu hnen atangin India rama Nurse chawimawina sang ber Florence Nightingale Award a dawng.

Vawiina he chawimawina hlanna inkhawm, Rashtrapati Bhavan, New Delhi a neih ah hian India ram state hrang hrang atangin Nurse hnathawk tha leh chawimawi tlak mi eng emaw zahte hnenah chawimawina hi hlan a ni.

Pi V.Lalhmangaihi hi Aizawl Venghnuai ah a cheng mek a, a duty-na hmun leh hmun dangah theih tawp chhuahin dam lote nunna vawi tam tak alo chhan tawh a, Mizoram sorkar hnuaia a ICU hmasa ber Civil hospital Aizawlah din a nih khan, sulsutu leh tha leh zung seng tu niin ICU lama a thiamna a chhuanawm em em a, a manual siamtu zingah telin mi tlawmngai leh taima tak, mamawhtute tana eng lai pawha che chhuak thei zel mi a ni.

National Florence Nightingale Award hi Ministry of Health and Family Welfare, Government of India chuan kum 1973 khan nurse leh nursing professional-te’n khawtlang tana an rawngbawlna tha tak takte hriat rengna atan a din a ni. Mizoram chhunga thawk nurse mi 16 in he chawimawina hi an dawng tawh a. Kumin a dawngtu  Pi V Lalhmangaihi hi 17-na a ni a, Mizo nurse, state pawna thawk pahnihin an dawng tawh bawk a ni.

He chawimawina hi ramchhunga nurse chhuanawm tak takte hnena hlan thin a ni a, Damdawi in emaw, khawtlang emaw, zirna emaw, enkawlna hmun a  hna thawk tha bik, nunna chhanchhuah leh hun khirh tak kara hriat reng tlaka thawk nurse-te tan ram pum huapin he chawimawina hi hlan thin a ni.

He chawimawina ah hian pawisa fai cheng sing 5 leh medal pek thin an ni. Mizoram sorkar chuan kumin atangin dan mumal tak siamin lawmpuina citation leh pawisa fai cheng sing 5 a hlan bawk ang.