Motivational Speech of Lallianzuala Chhangte Footballer::Class X zirlai te hnenah
Dt 27/6/2025 @ Lunglei Press Club: Thalaite Class X zirlai te hian ngaihsan tur dik ngaisangin ngaihhlut tur dik ngaihlu rawh u. Chhungkaw harsa tak atanga seilian ka ni a, Boot leina tur tuakin Chanchinbu te pawh ka sem thin. Inkhelhna tha pawh kan nei lova, kawngpui nen intawmah kan khel thin. “I chak zawng i khel a i vannei” te min ti a, mahse a ni lo. Ka hriat reng thin chu follower ngah ringawt emaw ka ngaisang lem lo. Ngaihsan tur dik leh entawntlak tur dik ka entawn ve thin. Chu chuan vawiin hi min thlen ka ti lo thei lo. Mihlawhtlingte nun ka enin an hlawhtlin hnua an thil neih te neih ve nghal mai tum lovin an neih theihna tur phen a an thawhrimna leh an beih hram hramna, an insumtheihna te ka entawn ve thin. Chuvangin nangmi pawh hian vawiinni a ka thil neih ka Sana, ka incheidan entawn hmasa lovin hetiang ang Pathian khawngaihna zara ka neih theihna tur a ka insumtheihna leh ka tumruhna entawn hmasa zawk rawh u. Mi hlawhtling tam tak te hlawhchham der hnu a beidawng lova an rawn comeback dan te hi entawn rawh u.
A dawt lehah chuan thil kan tihna reng rengah rinamwna a pawimawh. Bible-ah pawh hnathawktu rinawm chanthat zia kan hmu a ni. Tunah chuan enge kan rinawm theihna kan tih chuan Zirlai vek kan ni a, kei pawh zirlai ka ni a, kan thil nih tum emaw kan zirna emaw chauh buaipui rawh u. A chhan chu zirna emaw sporta a hma kan sawnna daltu leh kan nih tur ang nih tir thei lo tu paihbo a ngai. Games khel a zan rei tak taka men leh zing tlai tak a thawh te bansan tur. Chuan, ruihhlo hian kan ram a eichhe nasa em em, mihring nuai 14/15 vel kan awm a, Home 40 chuang Mizoramah a awm !. Thler tinah ruihhlo ngai an tam em em a, inchhungkhur min ti buai. An nun an tichhia a, chhungkua an ti buai a , chhungkua, khawtlang Kohhran lu an ti hai takzet. Mahni nun hlu lo ni a inhriatna te an nei a, damtlak lova inngaihna te an nei a, an nun an ti chhe em em a ni. Ruihhlo lakah fihlim ula, in lo ti anih chuan sim hmak rawh u. Ruihhlo leh games in a tihbuai vanga nih tur ang ni lo an tam. In thian ten ti ve tur a an sawm che u in NO ti ngam rawh u. In zirna emaw, in thil nih tum nih in tum naah rinawm takin ti ula, Zirlai in ni a, theihtawp a in kal zel chuan Pathianin lawmman a pe ang che u.
Ka Nu hi Angawandi teacher a ni a,an hna hi mite ngaihsan lemloh a ni. Thlakhatah tlemte an hlawh a, mahsela rinawm tak hian a thawk ve thin a, an hotu ten an endik in an vil reng ngai bawk lo. Naupang te te puitling taka an seilen theih nan leh sikul a an kal hun a an bo lutuk loh nan a fuih ve thin. Miten an hmuh loh lai pawha rinawm taka a thawhna chu a mak khawp mai. India rama chawimawina sang National Award tum 2 lai a dawn phah a, a ropui ka ti khawp mai. Tunah hian Sorkar tihpui a awm apiang Republic Day, Independence Day etc ah hian Ka Nu chuan sawmna a dawng ziah, Lallianzuala Chhangte hian VIP sawmna a dawng ngai lo. Nangni pawh zirlai in ni a, inthil tih a hniam emaw a sang emaw rinawm taka Pathian ropuina nen a in tih phawt chuan Pathian in sang takah a dah ang che u. In thil tihna apiangah rinawm takin ti ula, ‘Chawimawi la, anin a chawimawi ang che u’ Bible in a tih kha.
Pathum naah chuan tun hun hi ngaihlu ula , ka thianpa in a sawi thin chu (Ka senior a ni) ‘In kum ang hun kan nih hun lai hi a lo ngaihawm ber a ti. Ka ngaihtuah let hian M/S, H/S kan kal lai kha a nuam ber.Tunah hian naupang te te in ni a, tun hun hi a hlu. Upat hun, hna neih hun in chak mai thei. Nitina Sikul kal te kha kan ning ve thin. Mahse ka hrilh duh cheu chu ‘tun hun hi a hlu a, a pawimawh a, nakin hun hriltu anih avangin theihtawp a nuamin hmang rawh u. Hmathlir eng tak nei ula, mahse tun hun hi nakin hun hriltu a ni a,ngaihlu ula, nakinah in in chhir lovang, tun hun hi tha takin hmang rawh u. Thuhrilhtu chuan vanglai chen turin min ti a, hrereng tur a min tih chu siamtu Pathian a ni.Pathianin amah hrerengtu te a thlahthlam ngai lova chakna a pe thin.
4-na a ka sawi duh chu kan aia u, kan zirtirtu te kan zah hle an ngai. Kan zirtirtu, nu leh pa leh rual u zawk te zah tur. Kristian kan ni a, Isua hnungzui tu kan ni. Bible in mahni chunga roreltu te thuawih turin min ti. Malsawmna hi sum leh pai, hausakna leh hmingthanna in a leitheih ngawt lo. Chuvanghin kan zirtirtu leh aia u zawk te malsawmna hi a hlu. Ka sawi fo thin leh Pathian malsawmna ka dawn thin chhan chu aia u pa, Nu leh pa, Kohhran hruaitu leh khawtlang hruaitu te malsawmna leh tawngtaina vang a ni . Min tawngtai puitu hi an tam lutuk a, . Pathian malsawmna bakah aia u te malsawmna a ni a, tawngtai hlut zia hrechiang tu ka ni. Chuvangin in zirtirtu, aia upa, nu leh pa te malsawmna a hlu lutuk. Vai ho in malsawmna an dawn nasat dan em em ka ngaihtuah thin a , Kristian te ai hian malsawmna an dawng tam thin. A chhan chu Nu leh pa thu an awih thin vang a ni. Kristian nih leh nih loh lam vang ni lovin Pathian thutiam anih tlat avangin malsawmna an dawng. Panjabi te thuawih zia chu Love marriage an ti a, an la hriat ngai loh te nen pawh an nu leh pa ten tha an tih chu kar 2/1 in hmuin a hnuah an in neihtir a, an nu leh pa hnenah an intulut thin. Keini pawhin nu leh pa thuawih thar ila, malsawmna tamtak a keng ang tih ka hrilh duh a che u.
Sawina hun ka nei tam lova sawi ka chak chu..tunlaiah Zirlai tamtak te Social media in lut thei vek a, khawvel hi awlsam takin kan fangchhuak thei tawh. Ka sawi duh chu min hual veltu te ah hian thu leh hla hriatchak, hmuhnawm, ngaihnawm a tam lutuk.Kan rinna sawi danglam hrawk hrawk thei tur zirtirna danglam tak tak a lo chhuak tawh. Heng zawng zawngah hian a pawmnuam leh awlsam ringawt pawm lo ula, Bible-ah enge in ziak zawng ula, zawm rawh u. Lehkhabu tha chhiar tam ula, thudik, thutak tan ngam Mizoram in kan mamawh. Chutiang kan neih hunah kan ramin hma a sawn zel ang. In lo kal zelna turah nang pawhin thutak i zawn a, thutak i tan ngam chuan engkawng pawh zawh la, i hlawhtling ang.
Aim in Life: Pu KL.Biakchungnunga’n a sawi thin chu My aim in Life... chu ‘Pathian rawngbawl nan a..’ in tih chuan Pathianin a hre zel ang cheu a ti thin a, a dik hle. Mahni chhungkaw chawm nan ni lovin Pathian ropui nan, ka mihring puite chunga rawngbawl nan he hna khi ka thawk dawn a ni ti a tum bulfuk tak in neih chuan Pathianin a tihhlawhtlin sak ang che u. Thil tih chak zawng in tihna kawngah hma lam pana kal peihloh chang, beidawn hun in nei ang. Chung hunah chuan Thufingte 3:5,6 I thinlung zawng zawngin Lapa ringla, nangma hriat naah innghat suh...tih kha i hriatreng chuan Pathianin a hruai ang che u.
ISL ka luh tirhin kum 18 vel ka ni a, ka nih tum ber chu Footballer, chumi zawh a ka tum chu Emerging player of the year vawi 1 tal dawn ve a ni., Chumi ni tur chuan Off season lai pawhin ni 1 pawh ka chawl mang lo. Theihtawp ka chhuah. Thiante chu Europe-ah te an kal a, kei chu Gym ah kalin ei leh in ka in sum a, chuan kan khel chho a, season 1 naah Pathian zarah ka che tha ve a, ka beiseina a sang ve em em. mahse ka dawng lo. 2nd season-ah Delhi Dynamo-ah dawng ngei ngei turah ka in ngai leh a, kei aia tha an awm ka ring lo, Mahse ka beisie loh deuhin midang in an dawng leh. A tum 3 naah Chennai FC ah ka kal a, chumi tum chuan Goal 7 ka thun a, kei aia dawng tur an awm ka ring tawh lo.Pathian khawngaihna zarah ka che tha ve em em a, mahse ka la dawng lo leh ta.
Kum 23 ka pel ve dawn tawh si, ka rilru a na ve em em a, kei aia khelchhia a ka hriat te’n an dawng zel tawh si a, ka hnual takzet tawh. Mahse ka hriatreng chu “I thinlung zawng zawngin Lalpa ring la, nangma hriat naah in nghat suh, I kawng zawng zawngah amah hrereng la, I kawngte chu a kawhhmuh zel ang che tih....a ni. Pathian chuan min hre reng a, League pumpui, Foreigner zawng zawng, India player ah 2 chiah in an la dawng a,. chu chu Pathianin ka dream aia tha zawk min pe a ni. Lalpa chu fakin awm rawh se. Hlawhtlinna kawng in zawh dawn a, Pathian a innghattute an in chhir ngai lo. Nangni pawhin tun atanga Pathian hi innghah nan a inhman phawt chuan i lo suangtuah aia sang zawkah a dah ang che u.
No comments:
Post a Comment