Pakistan hnena thuruk hrilh thintu nia puh India in man

 Pakistan hnena thuruk hrilh thintu nia puh India in man

Delhi-a Indian Navy hmunpuia thawk mek mipa pkhat chu Pakistani Intelligence agency ISI tana kum tam tak enthlak hna lo thawk tawh leh Operation Sindoor kalpui laia thuruk tam tak hrilhtu nia puhin man a ni. A cellphone an en chiannaah Vishal Yadav-a hian Navy leh ram venhimna hna thawktu pawl dang thuruk eng emaw zat chu hmeichhe pakhat, Pakistani hnenah sum hlawhin a thlen thin tih an hmu.

Yadav-a hi naval headquarters-ah hian clerk niin Haryana-a cheng a ni a, Rajasthan Police-a Intelligence Wing-in an man a ni. Police officer Vishnukant Gupta chuan Rajasthan-a CID Intelligence unit-in an chet vel dan chu ngun takin an lo chhui ru tawh niin a sawi.An enthlaknaah hian Yadav-a hian hmeichhe pakhat hnenah social media hmangin a pe chhawng a, ani hian Pakistani intelligence agency hnenah a pe leh chhawng thin tih an finfiah niin a sawi. Hmeichhia hi Priya Sharma a ni a, pawisa pein thu pawimawh leh mi bikte chauhvin an hriat tur thu rukte chu Yadav-a hnen atang hian a dawng thin niin officer chuan a sawi.

Chhui tawhna chinah chuan Yadav-a hian online game a khel nasa thin a, henga a pawisa a hloh thin khuh nan sum a mamawh hle niin an hria.Cryptocurrency trading account hmangin sum hi a dawng thin a, a chang chuan a bank account-ah pawh a lut thin niin officer hian a sawi.Yadav-a hi Jaipur, Rajasthan-a Central Interrogation Center-ah intelligence agency hrang hrangin thawkhovin thu an la zawt fiah mek zel.

Venhim hna thawktu pawl hrang hrangte chuan he thilah hian inhnamhnawih dang an awm em tih an chhui mek zel a, engtiangin nge thu pawimawh a lo put theih tih pawh an dap zel.Yadav-a an man atang hian social media chu mi enthlakna atana hmanraw hman langsar tak a ni tih a lang niin chhuitute chuan an ngai a. Venhim hna thawktute chuan mipuite chu social media-a thil rinhlelhawm an hmuh chuan an hnena thlen vat zel turin an chah.