Mizo Zirlai Pawl Headquarters Lunglei chuan Mizoram State University chu Lunglei-ah dah rawh se tiin thuneitute chu a ngen.
MZP Hqrs Lunglei chuan New Education Policy (NEP) 2020 hnuaia State tin te’n mahni State University neih a ngaih tawh avanga tun hnaia Mizoram Sorkarin Mizoram State University awmna atana Aizawl-ah bawk hmun a zawng leh chu hriatthiam har a ti hle a. Zirna kawnga hmasawnna rual khai zawka a awm theihna atan Lungleiah dah turin an ngen.
Tun dinhmunah hian Aizawl-ah heng zirna in lian - MZU; ICFAI UNIVERSITY; NIT; LAW COLLEGE; Nursing College; RIPPANS; IASE; Hindi Training College; ZMC leh Vety College a awm a. Hetiang anih lai a Aizawl-ah bawk Mizoram State University dah tum a ni hi Mizoram-a zirna kawnga hmasawnna rual khai zawk kan neih theihna daltuah MZP Hqrs. Lunglei chuan a ngai a. Mizoram Chhim lam aṭanga zirlaite’n mahni khawtualah ngei an zirnate an chhunzawm theih nan Mizoram Sorkar chuan Lunglei-ah Mizoram State University hi dah turin a ngen a ni.
MZU Southern Campus atana ram awm sa 1394461.91 sq.m lai a zau chu Mizoram Sorkar hian Mizoram State University dinna hmun atana hmang turin an ngen a. Mizoram State University hi Lunglei-a dah a nih ngei theihna atan a tawp thleng in MZP Hqrs. Lunglei chuan hma a la chhunzawm dawn tih an tarlang.
No comments:
Post a Comment