MAMB in sawhthing Rs 12-16 in hralh mek

Lunglei 27.5.2025: MAMB in Sawhthing Rs 12 ten an hralh chhuak Sorkarin Sawhthing hralh leh lei kawnga hmala tura a din Mizoram Agriculturral Marketing Board (MAMB) hotute'n sawhthing an lei sa chu an hralh zo tep tawh tih an sawi a, an hralh chhuahna rate erawh a tlawm rih hle tih an sawi. 

MAMB hotu ten an sawi danin, Sairanga FCI Kudam Buffer Stock point-a sawhthing dah khawm tam zawk chu hralh chhuah a ni tawh a, tunah hian quintal 2000 bawr vel a la awm a, district hrang hrang Secondary Collection Centre te pawhin an lei khawm sa chu mi hrang hrang hnenah an hralh chhuak zel a, tunah hian lei khawl sa khawl khawm a tam tawh rih lo tih an sawi. 

Sorkarin sawhthing hi loneitute hnen atangin a la lei zel a, June thla thleng lei a tum a. Sawhthing hi a neitute hnen atangin kg khat Rs. 50 in lei a nih laiin sorkarin a hralh chhuah leh na tuna rate chu Rs. 12 atanga Rs. 16 inkar a ni a, MAMB hotute chuan tuna sawhthing an hralhna chu a tlawm rih hle tih an sawi. Sawhthing hi mi chi hrang hrangin an lei a, a leitu tam zawk chu hnamdang Mizoram state thenawm a mi te an ni a, Mizoram chhung a mi sawhthing sawngbawlna hmun neitute pawhin an lei ve bawk

Ni khata thisen an mamawh zat chu chawhrualin unit 100 vel a tling

Civil Hospital, Aizawl (CHA)-ah thisen mamawhna a sang hle reng a, ni khata thisen an mamawh zat chu chawhrualin unit 100 vel a tling. 

CHA blood bank-a head of dept Dr. C. Zohmingliani hnen atanga ZALEN  thudawn danin, CHA blood bank atanga  hian Aizawl khawpui chhunga damdawi in hrang hrangten an mamawh ang zelin thisen an la a, hemi avang hian CHA-ah hian thisen mamawhna a sang hle reng a ni. CHA hi Mizorama blood bank lian ber niin, CHA blood bankin ni khata thisen a mamawh (an pek chhuah zat) zat chu unit 100 vel a tling thin a. Blood bank-ah thisen neih tlem deuh chang an neih thin avangin thawktute tana thlaphanawm rum rum chang a awm fo thin, hemi vang hian thisen mamawhte pawh replacetir chang a awm lo thei thin lo niin, blood bank HoD chuan a sawi. 

Hetih lai hian sawrkar kum liam ta, 2024-25 chhung khan Mizoramah a thlawna thisen pek percentage chu zaah 93.71 a ni a. Voluntary donation hi Association for Voluntary Blood Donation (AVBD) Mizoram-in a bituk lawk zaa 92 aiin a sang zawk. Mizoram puma thisen pek dinhmun chhinchhiahtu, Blood Transfusion Service, Mizoram State AIDS Control Society (MSACS) tar lan danin, April 1, 2024 atanga March 31, 2025 chhung khan Mizorama blood centre 11-ah thisen unit 34,752 pek a ni a, chung zinga unit 32,566 chu pek bik nei loa a thlawna pek (voluntary) niin, voluntary donation hi zaa 93.71 a tling. 

Kum 2024- 2025 chhung khan blood centre hrang hrangin blood donation camp vawi 611 an buatsaih a, chungah chuan thisen unit 22,602 pek a ni. AVBD Mizoram chuan 2024- 2025 chhunga voluntary blood donation percentage zat thlen tum (target) a siam a, chu chu zaa 92 a ni. An target tihhlawhtlin ngei tumin blood centre hrang hrang nen theihtawp chhuah a ni.

Private Hospital-a cheng nuai 8 chuang sen ngai thin chu cheng nuai 1.5 vel lekin a zai theih dawn - Lalrinpuii

MJA Free Check-ah Health Minister in Civil Hospital thuam that dan sawi 

Lunglei.27.5.25 : - Civil Hospital, Aizawl chuan MJA Gen Hqrs member-te tan a thlawna inentirna a buatsaih sak. Free Health Check-up hi nimin chawhma dar 11 khan Health Minister Pi Lalrinpuii'n Civil Hospital, Aizawl Doctors's Seminar Room-ah a hawng a. Ram dang nen khaikhin-in Mizote an dam rei tawk lo ni-a a lang chu a vei thusawiin, natna inkaichhawn theih loh chi, Noncommunicable diseases an tih mai Zunthlum, Thisensang, Cancer leh natna dang dang chu Mizote suat nasatu a nih avangin hetiang natna laka fihlim turin taksa enkawl that a, in-sawizawi a, Ke a kal tam a tul thu uar takin a sawi a. 

A khat tawk-a mahni hriselna dinhmun endik thin turin MJA member te a sawm. Health Minister chuan, Mizoram Sorkar-in mipuite tan a thlawna in enkawl theihna tur a duan, Mizoram Universal Health Care Scheme chu mi tinin chhawr tangkai se a duh thusawiin, MUHCS a la inziak lut lote chu inziak lut vek turin a sawm bawk. Pi Rinpuii chuan tunah hian Civil Hospital, Aizawlah Cardiology Operation Theatre an sa mek a, peih a nih hunah tunhma a an tih theih loh thil tam tak an ti thei dawn a, Kal thlak (Kidney Transplant) pawh an ti thei tep a. 

Lung zai theihna tur pawh ZMC&H ah bautsaih mek niin, hei hi peihfel a nih chuan Private Hospital-a cheng nuai 8 chuang sen ngai thin chu cheng nuai 1.5 vel lekin a zai theih dawn a, MUHCS-a inziak lutte tan chuan a thlawn vek-a tih theih a ni dawn a, hei bakah hian Thluak zaina thenga buatsaih tum a ni tih a sawi. Free Health Check-up hawnna inkhawm hi Civil Hospital, Aizawl Sr. Medical Supdt Dr. Lalchhuankimi'n a kaihruai a, MJA President Pu C. Lalrambuatsaiha pawhin thu a sawi bawk. MJA Free Health Checkup-ah MJA member te chu a tahtawlin a thlawn vekin an hriselna dinhmun endik sak mek a ni.

Electric Bill pek due date hnaih vangin bill pe an tam, counter an hawng rei

 Electric Bill pek tum intlar an tam : Rs Nuai 43.18 vawiinah Counterah pek a ni

Lunglei 26/5/2025: Electric Bill thar a chhuah tlai avang leh naktuk mai khi Due date anih tawh avangin vawiin khan P&E Deptt Revenue Sud. Division Lunglei-ah Bill pe an tam in nidang a dar 1:00 thleng vel hawn thin kha vawiin chuan hun zau taka hawn a ni a, chanchin buatsaih lai tlai dar 5:00 thleng khan Bill pe an la awm. 

Kan palaiin P&E Deptt Revenue Sub.Div a thawktu te a kawm naah Online(GPay)-a Bill pek hi kalpui reng ni mahse Counter a pawisa keng a pe hi an la tam  tih sawiin vawiin thleng a Online a Bill pe hi Consumer 2602 awmin Rs 24.06 Lakh a tling  a, Cash a Bill pe hi mi 4720 awmin Rs 43.18 lakh an ni. System a awm tawh Consumer hi 11378 an ni. Thla khat chhung hian Rs Nuai 100 hi Eng chhit manah hmuh a ni tlangpui a, a chang chuan Rs Nuai 120 te pawh a kai ve zeuh zeuh thin tih an sawi.Tuntum a Bill body lo thlengah chawi tur zat eg. arrear etc te a form ami nen inzawn lo a awm nual a, hei hian mi tam tak a ti buai a,hemi chungchangah hian Bill body hlui siamsa kha System thar a  print a nih vang a ni an ti.Tun tum a Bill lut hi thla hlui ami kha a la ni hlawm a, thla thar a lo lut tur chu ni 30 aia rei anih dawn avangin kan Eng chhit man Bill a sang deuh vek dawn tih an sawi.

Smart meter hman hun hi hriat chiah ni lo mahse reiloteah hman a ni dawn tih P&E Deptt Lunglei ami te chuan sawiin Bill pek nan hian Mob App thar, PMDMconsumer chu hman a tha tih an sawi a, hetah hiaan Bill pekna history zawng zawng a awm dawn a, Power kan hman zat, reading la tu tih te a enlet vek theih dawn a, Bill body hmuh loh pawhin kan Eng chhit man a lang vek dawn a, hman uar nise an duh tih an sawi.

Eng chhit man pe tha duhlo an awm ve reng chu an buaina pakhat a ni tih an sawi. March to April chhung hian PMD Lunglei atanga eng chhit man kan chawi tur hu Rs 96.36 lakh (Net Bill Amount ) tur chhut a ni.

Pekdan en duh tan : https://youtu.be/xvV0ZPoLCnI?si=CHsA1UAVWMVgFd0u

Science zirlai ten a Laboratory-a enchhin(Experiment) an tih anga kan ram hi enchhin a hun tawh lo= Congress GS

OFFICE OF THE MEDIA DEPARTMENT: LUNGLEI DISTRICT CONGRESS COMMITTEE

PRESS RELEASE  No. 18 of Dt 26/5/2025

Lunglei 26/5/2025: Pu Thanghmingliana Renthlei, Gen. Secy LDCC chuan Science zirlai ten a Laboratory-a enchhin(Experiment) an tih anga kan ram hi enchhin a hun tawh lova, tum nghet tlet tlawt Target nen a kalpui a ngai a, enchhin nan a min hmangtu chuan VVIP eitur Security an temchhin tir ang lekah min ngai tihna a ni a ti.

He thu hi vawiin a Congress Bhawan Lungleia Political Session, Pu V. Lalrinsanga Gen. Secy kaihhruaiah sawiin Pu Thanghmingliana Renthlei chuan Kan ram hi a rum a, dinhmun tha tak leh awhawm taka dah hi mitinin kan duhthusam a ni a, mahse chu kawngzawh tur leh min thlenpui tur chuan tawngkam thiam nazawng tih chi a ni hauh lo tih a chiang a ni. Tun kan dinhmunah ruihhlo in namen lovin kan ram a ti buai a, Sorkar tha leh fel chu nei ila,hetiang hi kan ni  tawp lovang.  Nitin mai a Drugs chi hrang hrang man tur a awm hian kan ram hruaitu te tih tur a tarlang chiang hle a ni a ti.

Kan thalai te hi thiamthil zirna lam kan uarpui a ngai tih sawiin College a a sang tel teh meuh in luh tir a sum tam tak seng a kum 3 zenzawn hun hman tir ringawt lo hian ITI kan tih te leh sekrek khawih thiam tur zawng a kan chher a ngai a, chu chu kan ram damna tur a ni, a ti.

Hetihlai hian Central Sorkar chuan Policy tha deuh deuh a rawn hung chho dawn a, chhim leh hmar, chhak leh thlangah National Highway kan lai zo deuh chiah a, tunah 4 Lane an rawn sial leh dawn. Rel lian chi a rawn lut thawhthang a ni ta bawk. Sumdawnna lamah chimral in kan awm mai ang tih a hlauhawm. He hun lo thleng tur hmachhawn tur  hian kan inbuatsaih a ngai a, chu chu Politician tha chuan a ram mipui te a hruaina tur a ni. Ruang phurh politics tih te leh sawhthing kg-ah Rs 50 a lei tih vel ah in sawimawi a hun tawh lo. A chingtu te rilru ti beidawng hmasak kher hi a tunlai tawh lo. Rs 50 aia tlem lova an lei anih pawhin Congress sorkar in ‘kan ti ang’ an tih ang kha an ti ve a ni mai a, chungchuanna vak tur a awm lo a ti.

Politician tha leh sorkar thaaah chuan mipui mimir te pawhin a kan hriat phak loh thil tha an duanchhuah thiam chiah kha hruaitu tha an nihna leh an chungchuanna tur a ni tiin Sorkar tha kan tehna tur chu thalai te tan sorkar in hna thar a siam sak tha em, loneitu leh kuthnathawktu te an lawm em? ruihhlo leh a kaihhnawih hrang hrang lakah kan ram a him em tih te leh UPSC (CS)CC Exam-ah  Mizo nula tlangval engzat nge tling tih te nise. A bak kawngpui tha, tuiin tur tha leh hnianghnar, Kawlphetha, Building sak tih te chu Sorkar tih tur sa a ni a ti bawk.

Issued by Media Department: LDCC

ZPM hian Sorkar hmasa hun laia, Mipui, Kohhran,NGO ang ni lo kan beisei ve a ni. Papuia MLA

 

ZORAM PEOPLE’S MOVEMENT (ZPM)

Southern Hqrs : Lunglei – 796701. Mizoram

Motto : Kalphung thar, Mipui Sorkar.

PRESS RELEASE NO. 35 OF 24-26

No. ZPM-02/ZPM/SL/MEDIA/2024-2026/35

SORKAR HMASA ANG KAN DUH TAWHLOH AVANG A ZPM HI LO PIANG ANIH ANGIN ZPM SORKAR PAWH HIAN SORKAR HMASA HUNLAI A MIPUI ANG NILO, KOHHRAN ANG NILO, NGO ANG NILO HI KAN BEISEI VE A NI. 

                                                - Lalramliana Papuia MLA.   Lunglei South

Dated Lunglei : the 26th May 2025 (Thawhtanni). Vawiin khan ZPM Southern Hqrs Party Office Venglai, Lungleiah chhung inkhawm leh Political Session hun hman niin Political Session-ah hian Pu Lalramliana Papuia MLA Lunglei South chuan thusawina hun a hmang.

Pu Lalramliana Papuia MLA chuan, ZPM Southern Hqrs in Lunglei hmasawnna tur atana mawhphurhna a pek umzuiin Lunglei ZPM MLA Pali chuan Lunglei lam tana hmasawnna tur umzui ngai bawhzuiin theihtawp an chhuah zui reng tih a sawi a.  Fire Station Building leh Traffic chungchang hmasawnna turte leh Border Trade chungchang hma la tura mawhphurhna pek a nih chungchangah pawh theihtawpa a umzui nghal thu a sawi.

ATL road chungchang sawi kaiin Pu Papuia chuan, hmanni deuh a tlawmngai pawl thenkhatin hmalakna a awm leh awmloh an va en tih sawiin tun dinhmun a hmalakna a awm loh chhan a sawi a, PWD Chief Engineer in thu a chhuah angin tun fur pui chhung hian hma lak theih ani rih dawnlo a, fur pui chhung a hmanrua leh tul ang te lakkhawm a, fur pui zawh veleh a hnathawh char char theih tur a tender pawh tih fel vek tawh ani tih a sawi. 

Mipui te’n kan thlir ber tur chu tun fur pui zawh velah hian hmalakna  a awm em tih hi ani tih sawiin hmalakna  a awmlo anih chuan Lunglei mipuite lamah kan tang a MLA te pawh na takin kan au leh mai ang a ti a, Lunglei Traffic hmasawnna tur chungchangah ZPM Southern Hqrs atanga mawhphurhna an pek angin theihtawp a a bawhzui nghal thu sawiin Pu Papuia chuan Lunglei a Traffic Branch hran din theih dan turte sawi niin thawktute leh thil hrang hrang vanga indaihlohna avangin Branch hran din chu a la harsat thu a sawi a, chutihlaiin hmanrua leh thil tul mamawh angte chu thuam chhoh hret hret ani a ti a, theihtawp a tih changtlun hna an thawk mek zel ani a ti a, Engineering College puitling theilo pawh 2026 Session atanga tan theih tumin inbuatsaihna kalpui mek a nih thu Pu Papuia chuan a sawi bawk.

Pu Papuia MLA chuan Fire Station chungchang pawh sawiin NDRF atangin 1080 Lakhs fund hmuh leh State Matching Share atangin 120 Lakhs belh tur ani bawk tih a sawi a, heng sum lo kal hi umzui  nih hnuah K-Deposit aṭanga  release dilin district danga Station building turte nen heng sum hmang hian Lunglei Fire Station Building pawh sak theih tur a tender mai theih tura peihfel ani tawh tih a sawi bawk. Kawrpuichhuah Border trade chunchang pawh sawiin Pu Papuia chuan State Level atang chuan nawr a harsa hle ani a ti a, Central lam hian Zorinpui lam zawk an ngaih pawimawh avangin State ang chuan hmalak a harsa hle ani a ti a,  Border trade hi ngaihpawimawhsak turin a mimal ang pawhin Sorkar laipuia Land Port Authority chairman lamah DO letter te a thawn tawh thu leh a tul ang ang a umzui reng an tum tih a sawi bawk.

Lunglei South bialtu MLA chuan Lunglei District mai nilo, a bialchhung tan ringawta tun Sorkarin kawng siamna atan chauh pawh Nuai 2000 chuang ruahmanna a siam sak ani tih a sawi a, he Sorkar hian Lunglei mipuite hi min duhsak hle ani tih hi kan hriatthiam a tul hle ani a ti.

Party mite pawh kan in enfiah hi a tul hle ani Pu Papuia chuan tiin, “Ram leh bial hmasawnna atan a MLA te pawh thlang tlin niin kan inngaih a, chutih laiin mi tam tak mahni hamthatna tur chauh a min vote an lo awm palh ang tih ka hlau hle a ni" a ti a “ZPM hi Mipui Sorkar tiin kan inchhal a, Party Worker thenkhat ten kan beisei ang kan hmulo anih pawhin Mipui beiseina hi chu kan hmuhtir a, kan tihhlawhtlin ngei ngei angai a ni.” a ti a, “Sorkarna kan siam hma a kan au hla te vawiinah hian keimahni infuih nan i hmang thar leh ang u” tiin “Tlin nan chauh a khang zawng zawng kha kan hmang anih chuan mipui hian min ring nawn leh tawh lovang” Pu Papuia chuan a ti a, “Sorkar hmasa ang kha mipuiin kan duh tawhloh avangin ZPM Sorkar hi alo piang ani tih hi kan hriatnawn a ngai” a ti a, “Hna lak chungchangah pawh keini chhungkua chu kan lo na deuh anih pawhin kan ramin a that phah dawn anih chuan, kan lo tuar ve anih pawhin keini chuan i tuar mai ang u hmiang.” Tiin Pu Papuia chuan Party mipui kalkhawmte chu a fuih a, Mipuite hi kan ti beidawng thianglo ani a ti a, “Sorkar hmasa ang kan duh tawhloh avang a ZPM hi lo piang anih angin ZPM Sorkar pawh hian Sorkar hmasa hunlai a mipui ang nilo, kohhran ang nilo leh NGO ang  nilo kha kan beisei ve ani,” tiin “Sorkar lam tihtur chin ringawt hi Zoram siam nan a tawk lova, mipui lam pawh rilru thara kan inbuatsaih ve a ṭul a ni” a ti bawk.

Vawiin Chhung inkhawm hi Pu K. Remkima President Lunglei South Block-I chuan kaihruaiin Rev. KV Thanga chuan hunserh a hmang a, Party mipui chhung inkhawm an kal tha hle a ni.

Sd /-

(C. LALRAMROPUIA)

Secretary

Media, Information & Publicity.

ZPM Southern Hqrs, Lunglei.

Dated Lunglei : the 26th May 2025 (Monday)

'𝗛𝗼𝗺𝗲 𝗜𝗻𝗿𝗲𝗹𝗯𝗮𝘄𝗹𝗻𝗮 Ṭ𝗵𝗮 𝗭𝗮𝘄𝗸 & 𝗥𝘂𝗶𝗵𝗵𝗹𝗼 𝗡𝗴𝗮𝗶𝘁𝗲 𝗘𝗻𝗸𝗮𝘄𝗹𝗻𝗮' 𝗦𝗮𝘄𝗶𝗵𝗼𝗻𝗮 k𝗵𝗮

 '𝗛𝗼𝗺𝗲 𝗜𝗻𝗿𝗲𝗹𝗯𝗮𝘄𝗹𝗻𝗮 Ṭ𝗵𝗮 𝗭𝗮𝘄𝗸 & 𝗥𝘂𝗶𝗵𝗵𝗹𝗼 𝗡𝗴𝗮𝗶𝘁𝗲 𝗘𝗻𝗸𝗮𝘄𝗹𝗻𝗮' 𝗦𝗮𝘄𝗶𝗵𝗼𝗻𝗮 k𝗵𝗮

(𝙿𝚊𝚗𝚎𝚕  𝚙𝚊𝚔𝚑𝚊𝚝 𝚌𝚑𝚊𝚕𝚝𝚕𝚊𝚒 𝚝𝚒 𝚊𝚗 𝚝𝚊𝚖! 𝙼𝚒𝚍𝚊𝚗𝚐 𝚝𝚎𝚗 𝚏𝚊𝚔 𝚊𝚗 𝚑𝚕𝚊𝚠𝚑)

                                                               ~ Zoa Tlau, 26.05.2025, Buannel Cabin

He sawihona pawimawh tak hi Zonet Zoram Kalsiam Programme-ah May ni 20, 2025 zan khan a chhuak a. Zonet YouTube channel-ah an dah a, thlirtu nuai 3.39 chuang an awm tawh. Panel-ah hian Police, Ukil,  Social Welfare Dept., ṬBCC, CYMA leh 'social activist' 3, an vaiin 8 an ni a. Darkar 1:55 chhunga rei a ni a, thlirletna pawh a tawi thei lo a, chhiar chhuak hrâm ang che. Host Pu Lalnunṭawma Fanai hian a fawm kim thawkhat viau a ni.

𝐒𝐚𝐰𝐢𝐡𝐨𝐧𝐚 𝐥𝐞𝐡 𝐚 𝐭𝐞𝐥 𝐭𝐞, 𝐦𝐢𝐩𝐮𝐢 𝐧𝐞𝐧:

Sawihona neih tur buaipuitu Pu Lalnunṭawma Fanai (Manuna) hian 'background' hrang hrang; dan hremi, dan lekkawhtu, CYMA, Home, activist leh sorkar dept. te a huikhawm hi a fakawm a. Hmaichhanah zawhna tam tak inup tawh inzawtin an inchhâng thei zêl a, thlirtute tan a manhla hlê mai. 'Live RTI' a ni ringawt alawm!

A hmuna chhimtu Pu Manuna'n a sawm te hi ruahmanna fel tak neia sawm a ni a. Gov't Mizo HSS zirlai naupang 40 zet an ni. Anni ang rual hian drugs hmansual a pawizia an hriat chian a, an kum ang rual aṭanga an hriata kan venhim ngai a tih vang a ni. A pawimawh hle.

𝐑𝐮𝐚𝐭𝐟𝐞𝐥𝐚 𝐍𝐮 𝐧𝐠𝐚𝐢𝐡𝐭𝐡𝐥𝐚𝐤 𝐚 𝐡𝐫𝐞𝐡𝐚𝐰𝐦:

Pi Vanramchhuangi (Ruatfela Nu) hian 'human rights, child rights' leh thil hrang hrangah vei neiin a lo thawh hlawk viau a ni thei e. He sawihona neih ṭuma a ṭawngkam chaltlai lutuk leh inchachhuah rilru pu sa ang hrima a awm kha hmuh a hrehawm.

ṬBCC founder 'Pu Zohminga misual a ni,' a han ti ringawt a. ṬBCC leh TNT enkawltute 'Evan da leh' tih lamhawia a puh te, Pathian kohna chhanga Home/Centre siamtute 'ruihhlo ngaite enkawl eizawnna atana hmang' tia a chhe bera 'record' awm reng tawh tur, mipui en tura a puh kha a pawi a ni.

Thihna chungchang an sawiah pawh Upa Lalnunpuia Hrahsel, ṬBCC Advisory Board Member, pawh kha a chachhuah deuh a. Ama'n jail-ah an thi ngai lo, a tih ringawt lah kha thudik a lo ni si lo. 'Home-ah an thi tur a ni lo' a tih ngawt  te pawh mihring kan thu lo, host a mausàm deuh bawkin ka hmu. Tel tam tawh lo se ti an tam viau.

𝐏𝐢 𝐋𝐚𝐥𝐟𝐚𝐦𝐤𝐢𝐦𝐢, 𝐀𝐝𝐯𝐨𝐜𝐚𝐭𝐞:

Ani hian lawm a hlawha a thusawi 'video clip' tawi pawh a darh nasa. Home te chu 1993 & 2020 Rules kan neih anga in register vek a, 'accreditation' ti veka sorkar laipui aṭanga puihna dawng turin a duh a. 'Minimum standard' tala kalpui a duh. 

Mizorama Home zingah 'accreditation' nei an la awm lo a, hetiang nei sorkar laipui puihna dawngtu Home-a awm hi India ramah mi 6,47,799 (2024-25) an awm thu Pi Famkimi hian a sawi. Dan zawm ila Mizorama Home 46 te hian Central & UNO ṭanpuina hial an dawng thei a. Inzirtirna neih nasat a ngai tiin zirlai naupang te pawl tinah syllabus-a telh a ṭulzia a sawi a, Mizoram chu Myanmar kaltlangin Manipur buai vangin khawvela meth. leh no.4 kaltlang tam berna a ni hial niin a sawi.

ṬBCC te anga ngawlvei damlo awm te chu Kohhran tinin mahni beram ṭheuh pawtdarh a, enkawl vek a nih chuan harsa leh hautak a awm lo ang, a tih hian lawm a hlawh viau. Kohhran rohlu ber chu a mipui te an nih avangin hei hi nasa taka buaipui a ngaihzia a sawi uar hle bawk.

𝐏𝐢 𝐕𝐚𝐧𝐥𝐚𝐥𝐡𝐫𝐮𝐚𝐢𝐢, 𝐌𝐒𝐃 & 𝐑𝐁, 𝐒𝐨𝐜𝐢𝐚𝐥 𝐖𝐞𝐥𝐟𝐚𝐫𝐞 𝐃𝐞𝐩𝐭.:

Ani hian zaidam takin zawhna a chhâng funkim thiam hle a, mipuiin kan ngaihven dan thlirin kan harh ta hle chu a lawm hle. Home 46 zingah Sorkar laipui MSJE fund hmu 11 an awm thu sawiin, Social Welfare Dept. chu co-ordinating agency an ni a ti a. 'Accreditation' neih vek tur a nih laiin nei an la awm lo tih a sawi a. Hei hi Mizoram bik a sawina a ni a, 2020 Rules khan Home tin te 'accreditation' a phût vek a, hei hi 'amend' hlekin Accreditation Committee vawi 2 an ṭhu tawha hma an la mêk. Hei hi an puitlin chuan Home te chu 'minimum standard' tala kalpui vek tur a ni ang. (Mi 5 tan ek-in 1, 10 tan bual-in 1, trained counsellor, psychological & medical services etc. te a ngai)

𝐔𝐩𝐚 𝐋𝐚𝐥𝐧𝐮𝐧𝐩𝐮𝐢𝐚 𝐇𝐫𝐚𝐡𝐬𝐞𝐥, Ṭ𝐁𝐂𝐂 𝐀𝐝𝐯𝐢𝐬𝐨𝐫𝐲 𝐁𝐨𝐚𝐫𝐝 𝐌𝐞𝐦𝐛𝐞𝐫:

Ani hi a thusawi leh thlir dan a hrisel hlê a ni. Pathian ṭihmi leh ringtu ṭha a nihna a hmuh theih. "Kan ram hi a nâ a ni," a ti thlawt. Ramthar kan vei chu ṭha hle mah se, 'social front' lam buaipuia ko thlak a ngai a ti. Ram ril hla zawka kal te aia tualchhung missionary hna a ṭulzia a sawi hi pawmawm leh thil ṭul lutuk a ni tih a lang. 'Kangṭhelh leh Meikawng sial Project' kalpui a ngai a ti a, ngaihtuahna a tithui. Home-a awm te hi Kohhran tinin 'sponsor' ila phurrit a nih a ring lo a, Pi Famkimi te nen an thu a inzûl hle.

𝐉𝐞𝐬𝐬𝐢𝐜𝐚 𝐋𝐚𝐥𝐥𝐚𝐰𝐦𝐳𝐮𝐚𝐥𝐢, 𝐒𝐃𝐏𝐎 𝐀𝐢𝐳𝐚𝐰𝐥 𝐒𝐨𝐮𝐭𝐡:

Police aiawh a ni a, 'khawm case' an neih ngai loh thu a sawi a, a dik ang. Chhungte mangangin Police ruaia mahni fate ṬBCC leh Home dang danga dah an awm nual a, hriat pawlh lo ila. 'Addict'-in mahni hman tur, sumdawnna ni lo, drugs an lo kawl pawh in UNODC dan angin, 'accredited' Home-ah course zawh thleng an awm duh chuan hrem lovin ngaihdam theih an ni, a ti. A sawi fiah felfai hle.

𝐏𝐮 𝐅𝐚𝐛𝐢𝐚𝐧 𝐋𝐚𝐥𝐟𝐚𝐤𝐚𝐰𝐦𝐚, 𝐀𝐬𝐬𝐭. 𝐒𝐞𝐜𝐫𝐞𝐭𝐚𝐫𝐲 𝐂𝐘𝐌𝐀, 𝐏𝐮 𝐇𝐫𝐢𝐚𝐭𝐚 𝐂𝐡𝐡𝐚𝐧𝐠𝐭𝐞 & 𝐏𝐢 𝐋𝐚𝐥𝐦𝐚𝐥𝐬𝐚𝐰𝐦𝐢, 𝐚𝐜𝐭𝐢𝐯𝐢𝐬𝐭𝐬:

CYMA ten theihtawp an chhuah dan Pu Fabian-a report pek aṭang khan an ṭhahnemngaihna leh inpekna a ropui hle mai. Sorkara pawisa dilpui leh a ṭula an neih anga puih thlengin an kalpui a ni. Ruihhlo ngai vák rawlai haw ngam mang lo te ṬBCC lama dah pawh an ngah e. Mahse, anni pawh dan anga an kal a ngai a, ngawlvei te anmahni duhthu ngeia Home-a an dah a nih loh chuan a dahtu pawh kum 5 jail tan theih a ni. Pu Hriata Chhangte pawhin ruihhlo ngai damlote thlavang a hauh ṭha khawp mai. Pi Mali hian fak a hlawh a, YouTuber te fimkhur tura a fuihna te a zahawm. Hei mai bakah hian inhnialna karah thulai a la thiam hle bawk.

𝐓𝐥𝐚𝐧𝐠𝐤𝐚𝐰𝐦𝐧𝐚:

Host Pu Lalnunṭawma Fanai hian ngawivei hi a vei ngang a, tunah Home/Centre-ah ngawlvei 4,048 an awm tih an sawi chu ṬBCC vânglaia 1,000 chuang an awm lâi nen chuan Home-ah mi 5,000 chuang an awm tihna a ni a. Pawn lamah Synod camping-ah 1,000 chuang an lut a, ngawlvei zat chiah hi chhiarpui neih ṭul a ti hle.

Ngawlvei chhiarpui hi Pu Manuna rawt angin kalpui ngei ngei a, an chhungkaw dinhmun hriat a pawimawh em em ta a ni. Hei bakah hian ṭhalai rual te 'target' nasat a ṭul a, Pu Nunpuia Hrahsel, Pi Famkimi leh host ngei pawh hian an vei ber pakhat a ni. Anni ngawlvei la ni ve lo te himna tur hian theihtawp chhuah a ngai ta, inzirtirna hi sunday school leh ni tin school zirlaiah pawh telh vek a hun ta e.

Belh tlêm - Tunah hian Heroin (No.4) aiin Meth & Cryst Meth. te hian min paltlang hnem zawk niin Police record aṭangin a lang a. Khehpuam kan thawnchhoh zâr kan zo mêk. Khawva inland drugs route lian ber pawh kan ni maithei. Kuminah April ni 15 thlenga Police record-ah chuan Meth. ₹ 31,19,58,400 & Crystal Meth. ₹ 15,50,70,000 man an man laiin, Heroin ₹ 4,82,04,000 man chauh an la man thung.