Bazarveng YMA buatsaihin Kohhran Thalai pawl hrang hrang Jt.Fellowship hlung taka neih a ni

Bazar Veng, Lunglei: Nizan Dt. 24.06.2025 (Thawhlehni)  dar 7:00 p.m khan YMA Bazar Veng Branch ten kumina an project zinga mi  Bazar Veng chhunga Kohhran hrang hrang thalai Jt. Fellowship chu Rusa Hall, Lunglei Govt.College- ah hlung taka hman a ni. 

He Joint Fellowship thupui ah hian Rom 12:5 "Krista ah chuan taksa pumkhat kan ni a"  tih hman a ni. YMA Bazar Veng Branch Zaipawl ten programme hawn nan Halleluia Chorus an rem a. 

He an hun hmanah hian Bazar Veng chhunga Kohhran Thalai Pawl 9 (Pakua) -

1.Adventist Youth Ministry    2.Church of Faith Thalai Pawl

3.PYD Bazar Local                4.PYD Kikawn Local

5.Salvation Army Youth        6.Salvation Church Thalai Pawl

7.KTP Bazar Branch             8.TKP Kikawn Unit

9.TKP Bazar Veng Unit

te hi an kal khawm a YMA Bazar Veng Branch hruaitu te leh member te nen he an hun hman ah hian  member 314 an kal khawm a. Kohhran hrang hrang thalai pawl aiawh ten Special Item - Fak lam, Group Zai, Live Band, Solo te entir in Pathian faka zaihona hun hlimawm tak an hmang a. 

He hun hi Bazar Veng Khawtlang tana rawngbawlna ah YMA leh Kohhran Thalai pawl te pheikhai rual taka rawngbawl ho zel tura in fuihna leh insawmna atana hman a ni a. Kohhran leh Khawtlang tana thalai te in sangmar tur leh tan lak ngaihna laia tan la tlang tura infuihna atan hman a ni.Tun tum hi YMA Bazar Veng Branch ten an veng chhung Kohhran Hrang Hrang Thalai pawl te nen tum thum (3) Jt. Fellowship an buatsaihna a ni bawk.

ZUNZAM MORNING NEWS ( 25.6.2025 )

Compensation lak beisei avanga mimal ram pass chhuhsakah LADC RO an puh.

Pangkhua Village Council, Young Lai Assn leh Lai Women Assn chuan thuchhuah intawm siamin, 'Thingsai-Bualpui-SaisihPangkhua-Sangau (TBSPS) road, 7.800 km - 29.180 km (Pangkhua ram chhung bik) laih turah he kawng aligment-in a paltlang chhungah khawtlang neitu VC leh NGOs te hriatpuina tel lova Pu LH.Ramdingliana, RO, Revenue LADC Sangau-in compensation lak beisei avanga mimal ram pass chhuhsaka ram a lak avangin Pangkhua khaw tlang hruaitute, Village Council & All NGOs meeting chuan a hnuai mi ang hian thuchhuah a siam a ni, a ti. 

Pangkhua thuchhuah - 

1. LADC, Land Revenue & Settlement Dept, Sangau-a RO te leh an staff-ten TBSPS road laih tura aligment-in a paltlang chhungah a ram neitu VC-te hriatpuina leh rem tihna tel loa compensation beisei avanga ram pass tam tham tak an insiam hi tha lo kan tiin cancel ni rawh se. 

2. Pangkhua mipuite zingah he alignment-in a paltlang chhunga ram nei mi thenkhatte pass renew tura tih niin renew tura ram neituten pawisa pe a office an dawr laiin chhuanlam siama renew sak duh lovin pawisa pawh pekkir an ni. Hei hi remchang a lain pass thi tawh anga cancel sakin mimal ram chhungah pass thar a siam a ni tih ama tawngta ngei atanga kan hriat avangin pawi kan ti a, ram neitu dik tak hnenah ram hi pek let vek ni rawh se. 

3. LH.Ramdingliana, RO hian pass renew leh PS forwarding pawh ti duh loa mipuite min hrekbet reng hi na kan ti a, hetiang hi thleng tawh lo se, kan ti. 

4. TBSPS Road laih tur hi aligment avanga rei tak a thuanawp tawh lai leh BRO-ten compensation a tam an hlauh thawn avanga kum tam tak harsatna kan tawh laia Pangkhua khua leh tui ni lo, Revenue Dept-a thawkte leh an laina hnaite ram pek an ni hi pawi kan tiin ram hmasawnna tih thuanawp tumna leh ram leh hnam rawknaah kan ngai 

5. Compensation beisei avanga kum 2023-2025 chhunga Revenue Department-ten ram pass an siam thar zawng zawng te hi cancel ni rawh se. Pangkhua VC leh NGO-te chuan a chunga an thilphutte hi tihhlawhtlin a nih loha mimal ram cancel anih loa mimal ram cancel sakten an ram ngai ang taka an neih let leh hma chuan ni 25.06.2025 - 03.07.2025 chhunga preliminary survey, Deputy Commissioner, Lawng tlai atanga neih tur hi an rem ti lo a ni tih ram mipuite hriatah puangin, he kawng hi a hma lama laih a nih theihna tur leh kan thil phutte a hlawhtlin theih nana hma laksak turin thuneitute an ngen nghal a ni.

==================

Tualbung a sazuk kap nia hriat mi pali an man.

Saitual Forest Range a thawktute chuan Tualbung Branch YMA hnen atanga report an dawn bawh zuiin niminpiah khan Tuikhau ram, Tualbung a sazuk kap nia hriat mi pali an man. Sazuk kaptu nia hriatte hnen atang hian sazuk sarep, a kawchhung leh a ke bakah Silai (Ulhbun) pali mansak an ni a. Wildlife Protection Act, 1972 Section 9 leh Section 39 an bawhchhiat avangin case siamsak an ni a. 

Aizawl District Court ah hruai an nih hnuin Central Jail ah dahluh nghal an ni. EF&CC Dept thawktute hnen atanga thudawn danin Sazuk hi The Wildlife Protection Act, 1972 hnuaiah Schedule-1 hnuaia humhalh bik a ni a. Schedule-1 hnuaia ramsate chunga kutthlak emaw an taksa bung leh a sa te kuta lo kawl leh sumdawnna atana lo hman emaw chu Danin a khap tlat a. Dan bawhchhia chu kum 3 atanga kun 7 thleng Lungin tan theihna a nih bakah cheng 25000 aia tam chawi tir theih a ni a. Tin, nungcha leh savate chunga kutthlak na reng rengah dan anga hmalak zel a nih tur thu  an sawi a ni.

=================

MJA leh I&PR Deptt buatsaihin Nimiin khan Lunglei, Hnahthial leh Mamit ah te Media Workshop buatsaih a ni.

Lunglei ah chuan Workshop hi Press Club ah neih a ni a, MJA Lunglei President Pu H.Lalthansanga'n a kaihruai a, Pu Vanneihtluanga Ziak " Traditional Media and new Media" tih leh Dr.H.Laldinmawia ziak " Mizo tawng ziak dan dik" tih te zirho niin thuziak zirhona hi Pu C.Lalhruaitluanga IPRO leh Pu K.Lalrinpuia MJA Treasurer ten an kaihruai a, sawihona hun hman a ni. He hunah hian MJA memberte bakah Cable TV lam leh AIR lama chanchin thar buaipuitute mi 30 chuang an tel.

Nimin vek khan I&PR leh MJA tangkawpin an buatsaih, Media leh Mizo tawng chungchang zirhona, Hnahthial DIPRO pisa-ah neih ani a. He Workshop hi Hnahthial MJA President, Pu F. Zosangliana chuan kaihruai in DIPRO, Pu F.Lalrinfela chuan zirhona hi a kaihruai a. Traditional Media leh New Media" bakah "Mizo Tawng Ziah Dan Dik" tih thupui hmangin zirhona leh sawi hona hun hman ani a. Zirhona hi, Pu F. Lalrinfela'n a kaihruai a ni.

Mamit ah pawh District I&PR Officer Chamber-ah Mamit District chhunga Print leh Digital Media-te tan  “Media Workshop” buatsaih ani a, inkhawm hi DIPRO Pi Biaknungi chuan akaihruai a, Mamit MJA President Pu Lalhuma'n thu sawiin, Tunlai ah Mizo tawng ziah dan mai bakah lam rik dan ah pawh, dik lo tam tak a awm tawh a, social media hmanga video siam thin te pawh in, Mizo tawng hman dikna chang kan hriat a pawimawh thu asawi a. “Traditional Media and New Media” tih leh “Mizo Tawng ziah dan dik” tihte chu zirho ani a, sawiho zui a ni  bawk.

===============

Khawl lam harsatna avanga buhfai, thla thum quaota, sem mai theih loh chu sem tan ani ta.

Furpui lo thleng tur thlir lawk a, Central Sawrkarin State sawrkar te NFSA buhfai (athlawn chin) thla thum chhung i.e. June, 2025 atanga August, 2025 pe thei tura angen angin Mizoram sawrkar Supplies- Department pawhin theihtawp chhuah a hma la in, thla thum daih ration quota hi FCI atangin aphur chhuak kim vek tawh a, June thla bul lam khan >sem nghal mai tur a ni nachungin, khawl thil ah rokhawlhna a awm avangin sem theih hun hi atlai ta deuh a, mipui hriatthiamna an ngen ani.

Thla thum ration NFSA quota hi dan pangngai angin, a thlawn veka khul tur ani a, mipuite chu harsatna awmlo a, NFSA thla-thum ration quota la vek tur leh retailer te pawn an mawhphurhna tha taka hlenchhuak theuh turin Supplies Department chuan duhsakna ahlan a. Card Pawl, a man nei chin (additional Kg 3, kg 1 cheng 15 man), Card Var leh Card Sen hi, a pangngai a, thla khat te te a, lak tur ani thung ang.

=================

Mizoram Universal health Care (MUHCS) a, inziahluh hun chu tun thla hian atawp dawn a, health Minister Pi Lalrinpuii chuan la inziaklut lote chu hun tawp hma a inziak lut vek turin a sawm.

Nimin khan Mizoram sorkar Finance Department Office Memorandum siamin Thla thum – sorkar Quarter khat ral hma in Mizoram State Health Care Society in., sum hmanral tur achhut zat ang, a sanction thin dawn tih a tarlang a ni.

MUHCS hotute sawi danin Mizoram chhunga Private damdawiin 13 ten Mizoram Universal Health Care Scheme an zawm tawh a, hei hi za zela 40.62 niin a bak private damdawiin dang nen hian inbiakna kalpui mek a ni. Private damdawiin thenkhat scheme la zawm lo te chu mipuiten harsatna an tawh mek hrethiam a, MUHCS hnuaia mipui tana inziak lut turin an ngen a, tun dinhmunah Mizoram chhunga damdawiin 13 ah MUHCS hman theih niin Aizawl ah 6, Lunglei, Champhai leh Lawngtlai ah 2 theuh bakah Siaha ah pakhat inziak lut a awm a ni. Mizoram pawnah pawh cluster 6 huam chhunga damdawiin 20 chuangin MUHCS hi an zawm tawh a, chung zingah chuan Max Hospital hnuaia Hospital 9 te, Narayana Health cluster hnuaia hospital 4 te, Manipal Hospital Kolkata hnuaia hospital 4 te, Kolkata a Hospital 3, Assam a Hospital 3 leh Delhi a hospital pakhat te an tel a ni.

Assam a Health City Hospital, Jeevan Jyoti hospital, GNRC Hospital te, Kolkata khawpuia Ruby General Hospital, BM Birla Hospital & Heart Institute, Peerless Hospital te, Max hospital cluster a hospital hrang hrang - Max Super Speciality Hospital (A Unit of Devki Devi Foundation, East Block, Saket);  Max Super Spciality Hospital (A Unti of Max Health care Instutute Ltd) West Block, Saket; Max Super Speciality Hospital (A Unit of Gujarmal Modi Hospital and Reserach Centre of Medical Sciences) Saket;  Max Super Spciality Hospital (A Unit of Crosslay Remedies Ltd.) Ghaziabad, UP;  Max Super Spciality Hospital (A Unit of Balaji Medical and Diagnostic Reserach centre, patparganj;  Max Super Spciality Hospital(A unit of Max health care Institute Ltd) Shalimar Bagh; BLK Max (A Unit of Lahore Society Ltd), Radha Swami Satsang Rajender Nagar; Max Super Speciality Hospital (A Unit of Muthoot Hospitals Pvt,. Ltd,) Dwarka, Max Super Spciality Hospital, Sector 128, Noida, UP; Rabindranath Tagore International Institute of Cardiac Sciences, Mukur; Narayana Multi-speciality Hospital, Basat; Narayana Multi-speciality Hospital, Howrah; Narayana Multi-speciality Hospital, Podrah, Howrah; Manipal Hospital Dhakuria, Manipal Hospital; Broadway, Manipal Hospital, EM By-pass, Indian Spinal Injury Centre, New Delhi ten an zawm tawh a ni.

Mizoram Board of School Education (MBSE) chuan vawiin ah HSSLC leh HSLC Compartmental & Improvement Examinatio 2025 result a tichhuak.

HSLC Compartmental exam ah hian exam beitu 58 ah, 26 an pass a, 32 an fail a, pass percentage 44.83 a ni. Improvement- exam beitu 2 awm in improved percent 100 ani.

HSSLC Compartmental Arts ah, exam beitu 59 ah 12 an pass a, 47 an fail a, pass percentage 20.34 ani a. Science ah exam beitu 13 awm in 7 an pass a, 6 an fail a, pass percentage 53.85 a ni a. Commerce ah exam beitu 8 ah 4 an pass a, 4 an fail a, za zelah 50 >in, an pass a ni. Improvement exam hi Arts ah exam beitu 10 ah 6 an improved a, Science ah exam beitu 11 ah 6 an inproved a, Commerce ah exam beitu improved an awm lo a ni.

Kumina HSSLC pumpui ah za zela 81.37 in an pass a, HSLC ah za zela 76.84 in an pass a ni.

===============

Arpa insual tir Aizawl District magistrate in  a khap.

Tunlai hian Aizawl hmun kilkhawr kleh fianrial ah te pawisa inchawi a ui leh ar insualtir in, mi 100 atanga 300 bawr vel an pungkhawm thin tih hriat ani a, Pawisa inchawia ran insualtir hi The Prevention of Cruelty to Animals Act, 1960, section II chuan a khap tlat a. Hetianga inhnamhnawih leh dan bawhchhetute chu pawisa chawitir leh thla 3 thleng lungin tantir theih anni a. Chuvangin Aizawl District magistrate Er.Lalhriatpuia chuan Aizawl District ah pawisa thapa ran insualtir alo rem theih nan, "Aizawl District huam chhungah mi tumahin pawisa inchawiin ran an insualtir tur a ni lo" tiin thupek achhuah a. He khapna hian thla 2 chhung ahuam anga, a zawm lote chu Section 223 BNS 2023 hmangin an chungah hremna lek theih a ni  ang.

=============

White House chuan US in, Iran Nuclear hmun, a bomb ah, engmah a ti chhe lo ni awm a, intelligence- assesment putru nia sawi chu a pawm lo.

Intelligence lamin an zir chianna atangin US in, Iran nuclear hmun pathum an bomb >chuan, Iran nuclear programme ati chhe lo a, nuclear bomb siam turin thla engemawzat chauh, a hnungtawlhtir mai nia sawi ani a. Pentagon Defense Intelligence Agency assesment CBSD leh media danga putru nia sawi ah, US bomb-in, Iran nuclear programme atih chhiat vek loh thu hi tarlan ani a. Hei hi thil diklo hulhual ani a, president Trump hnuhhniam leh tih hmingchhiat duhna ani, tiin a tarlang a. Middle east palai Steve Witkoff chuan he intelligence assesment putru nia sawi hi sorkar phatsanna, sorkar beihna leh ram leh hnam phatsanna anih thu asawi a, hei hi chhui tur anih thu asawi a. Damage report hi achhiar vek thu leh heng nuclear hmun pathumte chhe vek lo anga ngaih theihna a awm lo tih a sawi.

President Trump pawhin Fordow ah bunker bluster bomb 12 kan thlak a, a tichhe vek lo a, rinhlelhrual ani lo tih asawi a, intellegence assesment report ah achhe vek lo nia sawina hi ngaihdan atthlak tak anih thu asawi.

Hetihlai hian Israel leh Iran inkahhai chu bawhchhia nia an inpuh ve ve hnu ah inbeihna a awm ta rih lo a. Inkahhai tantirh a, inkahhaina an bawhchhe ve ve chuan US President Trump pawh ati thinur hle a, an chungah alawm loh thu asawi a. Tunah chuan ram pahnihte hian inkahhaina thuthlung an zawm ve ve tawh tiin Donald Trump chuan asawi.

Inkahhai hma lawk khan Israel indo thlawhna te chuan Iran hmar lama Astaneh- Ash-ra-fiyeh khua, chenna in 4 ngawt an kap chhia a, Iranian, nuclear- scientist pakhat Mohammad-reza- Sedighi leh midang 8 te an thi a, mi 33 lai in hliam an tuar niin Iran chuan apuang a. 

Iran health minister chuan israel nena ni 12 an indo chhungin Iran ah mi 606 an thi niin a sawi a. Israel lam pawhin mi 28 an thi niin an sawi thung.

================

Media Workshop vawiinah nei dawn

Vawiin dar 11:00Am hian Lunglei Press Club-ah I&PRO Deptt leh MJA buatsaihin Media Workshop a hun hman a ni dawn. Pu Vanneihtluanga thuziak leh Dr H. Laldinmawia thuziak an zir ho ang. Hetah hian MJA member te bekah Youtuber leh AIR news te pawh tel tura beisei a ni.

Iran chuan US laka phuba lak alo tiam angin Qatar , missile hmangin abei a...

Iran chuan US laka phuba lak alo tiam angin Qatar a, Al-Udeid, air- base, West Asia a, US sipaite hmun pawimawh ber chu, missile hmangin abei a, thi leh hliam an awm lo.

NDTV in atarlan dan chuan he operation a, missile an hman hi US in, Iran nuclear- facilities beih nana missile an hman nen, a inzat thawthang a ni.

Hetihlai hian Doha khawpui chung ah pawh thil puak ri- dur, eng zuai zuai, a awm a, air defence in, missile lokal alo kah darh nia hriat a ni.

Iran in Qatar a, US air base beih nana missile a hman zat sawi dan, a inang lo hle a, Iran chuan 6 niin asawi a, US chuan 14 niin asawi a, Reuters chuan 19 niin a sawi, heng missile thlawkte hi air- defence hmanga lo dan vek ani a, thi leh hliam an awm lo a ni.

Iran in Qatar abeih hma hian US leh UK chuan an mi te Qatar a, awmte chu hmun him lamah insaseng turin an ti a, US mi, sang riat vel Qatar ah hian an cheng a, British mi, sang chuang fe an cheng bawk. Iran hian Qatar a, US sipai hmun a beih avang hian Qatar thinrim a hlau hle a, a target base hi, Qatar a mihring chenna atanga hla tak niin, civil mi- tan, hlauhawm a awm phalo tih Iran Supreme National Security Council chuan a sawi. Iran Armed Forces thupuangtu chuan, Qatar a American- base beihna hi Revolutionary Guard- Corps te hmalakna niin asawi.

Qatar chuan Iran in, an ram chhung ami a bei chu sawisel in, Qatar air-space pawh hun egemawchen fimkhur thu ah a khar a, Bahrain leh Kuwait te pawhin an ram air-space pawh an khar ve zawk bawk a ni.

Iran hian Qatar hnenah an ram chhunga US air base abeih tur hi a hrilhlawk a. US president Donald Trump pawhin an rawn bei dawn tih hrilhlawk an nih thu sawiin Iran chungah lawmthu a sawi a ni.

US Official te chuan Iran missile launcher te chu Qatar lam hawitir an ni tih an sawi, Flight- Tracking- website te pawhin Iran in, Qatar a, US airbase lama missile akah hma hian Qatar chunga thlawhna thlawkte pawh divert an ni tih a tarlang a. Hamad International Airport hi khawvela thlawhna tum hmun lian ber zing ami niin nitin lut leh chhuak, mi nuai khat leh sing li vel an awm a ni.

Doha atanga chhim thlng lam, Al-Udeid air-base ah hian US sipai sing khat vel an awm a US Central Command forward hqrs ani a, air operation, combat aircraft leh drones- base ani a, he hmun atang hian Iraq, Syria leh Afghanistan a, Operation te kenkawh alo ni thin a. Ram hecrate 24 a zau, a thut a, US sipai thlawhna 100 dawn he hmun ah hian dah a ni,

Hetihlai hian President Donald Trump chuan Israel leh Iran ten inkahhai neih an remtih thu asawi a, hun reiloteah inkahhai hi puan ani ang tih a sawi.Iran Revolutionary Guard- Corps chuan US president Trump-a'n inkahhai awm tura asawi chu thu diklo ani tiin US in Iran abeihna chungchanga mipui hruaikawi tumna mai mai ani tih an sawi.

Iran foreign minister chuan Israel in, Iran beihna atih tawp chuan Iran chuan Israel beih chhunzawm zel tumna a nei lo tih a sawi.

LPS -ah 'Mizo Talent' show nei dawn

 

Mizo zinga talent nei thate zawnna tur 'Mizo Talent' chu July ni 24,2025 atangin neih tan a ni dawn a, heta tel tumte tan LPS office atangin entry form lak chhuah theih ani a, form hi pdf format download a, hman theih a ni bawk.

Boruak nei lian tak tura beisei TV Reality show 'Mizo talent'-ah hian Judge, mi pali an awm dawn a, Mizoram pum huapa mi- hriat hlawh, talent hrang hrang neite endik tura rintlak rual te, Judge thuthleng ah an thu thei dawn a ni.

Mizo Talent a tel tumte tan hian form pek chhuah mek niin thehlut mi engemawzat an awm tawh bawk a. Entry form hi, a hard copy cheng 10 in office hawn hun Thawhtanni atanga Inrinni inkarah nitin zing dar 9:30 atanga tlai dar 5 thleng LPS office-ah alak chhuah theih a, a pdf download a, online a, thawn pawh pawm vek ani a, July ni 14, 2025 thleng entry form hi a theh luh theih dawn a ni.

Mizo Talent ah hian lawmman pawh a tha dawn a, pakhatna in cheng nuai 2 adawng anga, top 3-a tling, pakhatna ni pha ta lo mi pahnih in cheng sing 2 ve ve an dawng anga, top 10-a tling, top 3-a inhlang kai zo ta si lo mi 7 ten cheng sing 1 theuh an dawng dawn bawk a ni.

Intihsiakna tur hi chi nga a awm dawn a, Zai, lam, instrumental music, magic show leh Acrobatics te a ni a. Zai bikah hian mimal, group singing, Choir leh Band (Female leh Boy Band) angin atel theih dawn a, zai remna turin rimawi hmanrua acoustic chhawpsa ahman theih anga, track hman duh chuan mahni senso a, siam hman tur a ni ang.

Lam thiam te tan lam chi hrang hrang hmangin intihsiak hi a hmachhawn theih dawn a, mimal leh pawl (Group) angin a tel theih dawn a, a huhoa tel tumte tan erawh mi 10 aia tam lo tur a ni a. Mizo , Sap leh vai lam thlengin aleng vek a, Lam chhung hi 4 minutes aia rei lo tur ani ang, Music tel a, lam tur a ni a, contestant ten tract, an mahni in an in buaipui ang.

Rimawi hmanraw chi hrang hrang - guitar, piano, drums leh thil dang thiam te tan intihsiakna ah hian a tel theih a, music hmanrua hi chhawp sa a awm dawn a, mahni ta pawh ahman theih dawn a, Drums bik erawh show buatsaih tute chhawp sa hman mai tur a ni.

Magic thiam te pawh Mizo Talent ah hian an rawn in lan thei dawn a, Magic an show na tur hmanrua chu an in tum vek angai dawn a, Acrobatics huangah hian mimal leh a huho in atel theih dawn bawk.

Mizote zingah talent nei tha tak tak an rawn chhuak zel a, chung talent nei tha te, ram mipui hriata pho chhuah chu Mizo Talent buatsaihtu LPS Vision in a tum a ni a, heng intihsiakna tur hrang hrang kan tarlan tak te a, thiam na nei tan, entry form alak chhuah theih reng a ni,.

HSLC leh HSSLC Compartmental & Improvement result vawinah...

MBSE chuan vawiin chhun dar 12:30 hian HSLC leh HSSLC Compartmental & Improvement Examinations 2025 result a ti chhuak dawn a, Result hi MBSE Office, Chaltlang leh MBSE Regional Office, Lunglei leh heng Website www.mbse.edu.in leh www.mbseonline.com ah te en theih a ni anga, a mamawh tan a bu lei theihin a awm bawk ang,. Whatsapp leh Phone call in 9863883041 emaw 9863722521 ah emaw ngaihven theih ani bawk ang.

𝗜𝗥𝗔𝗡-𝗜𝗡 𝗨𝗦 𝗕𝗔𝗦𝗘 𝗔𝗡 𝗕𝗘𝗜𝗟𝗘𝗧 𝗩𝗘 𝗗𝗔𝗪𝗡

 𝗜𝗥𝗔𝗡-𝗜𝗡 𝗨𝗦 𝗕𝗔𝗦𝗘 𝗔𝗡 𝗕𝗘𝗜𝗟𝗘𝗧 𝗩𝗘 𝗗𝗔𝗪𝗡

(𝘙𝘶𝘴𝘴𝘪𝘢 𝘗𝘳𝘦𝘴𝘪𝘥𝘦𝘯𝘵 𝘯𝘨𝘢𝘸𝘪 𝘳𝘦𝘯𝘨 𝘐𝘳𝘢𝘯 𝘍𝘔-𝘪𝘯 𝘢 𝘵𝘭𝘢𝘸𝘩, 𝘜𝘚 𝘴𝘢𝘸𝘪𝘴𝘦𝘭𝘵𝘶 𝘭𝘦𝘩 ṭ𝘢𝘯𝘵𝘶 𝘵𝘦)

𝓟𝓱𝓾𝓪𝓱𝓴𝓱𝓪𝔀𝓶𝓽𝓾

                       ~ Zoa Tlau .  Pannel Cabin

Israel-in Tehran a beih zuinaah mi 950 ngawtin nunna an chân a, US chuan a ram mipui te fimkhur turin a chah nghal a. Trump chuan Iran hian indo tihtawp hi pawm tawh mai rawh se, tiin social media lamah a ziak nghal bawk.

Tun ṭum US-in Iran nuclear hmun pathum a beihna hi kum 1979-a Islamic revolution a thlen hnua Middle East-a khawthlang an inrawlh nasat ber te zingah a tel, tiin news report a ni a.  Ali Akbar Velayati, Iran supreme leader Ayatollah Ali Khamenei advisor chuan thungrulh nan Middle East-a US base leh US force ten base atana an hman te chu an beilet dawn tih a sawi, niin IRNA news agency chuan a tarlang. Iran hian Israel khawpui Tel Aviv leh hmun pawimawh dang a bomb nual bawk.

𝗨𝗦 𝗰𝗶𝘁𝗶𝘇𝗲𝗻 𝗳𝗶𝗺𝗸𝗵𝘂𝗿 𝗮𝗻 𝗻𝗴𝗮𝗶:

New York khawpui ngei pawh firfiak laka venhimna a khauh nghal hle a, US Department of States chuan khawvel ram hrang hranga US mi leh sa awm te chu firfiak laka fimkhur turin a chah mawlh mawlh a. Iran thlawptu firfiak te hian US mi leh sa an beih duh mai an ring a, khualzinna leh an awmna apiangah American te fimkhur hle tura hriattir an ni.

𝗜𝗿𝗮𝗻 𝗙𝗠-𝗶𝗻 𝗣𝘂𝘁𝗶𝗻 𝗮 𝗽𝗮𝗻, 𝗣𝘂𝘁𝗶𝗻 𝗮 '𝗻𝗲𝘂𝘁𝗿𝗮𝗹' 𝘁𝗹𝗮𝘁:

Vawiin hian US-in a beih avangin Iranian Foreign Minister Abbas Araghchi chuan Moscow panin, an sangawizawnpui Russia President Vladimir Putin chu a hmu dawn a. Russia thurawn pawimawh tak a la dawn niin media report-a tarlan a ni.

Russia hian June ni 13-a Iran-in beihna a tawh hnu khan Israel leh US hi a dem thu chu chhakchhuak ṭhin mah se, ralthuam leh thildangah a pui lo thung. Putin hian Israel-ah Russia mi ṭhahnem tak an awm ve a ti a.

Putin chu engvanga kum tam tak an ram ṭhian Iran leh Israel inbeihna chu 'neutral' taka thlir thei nge a nih tiin media ten an zawt a, Russia president chuan thildanga chhang vak lovin Russia ṭawng hmang Israel-ah ṭhahnem tak an awm thu a sawi.

𝗜𝘀𝗿𝗮𝗲𝗹-𝗶𝗻 𝗜𝗿𝗮𝗻 𝗮𝗶𝗿𝗽𝗼𝗿𝘁 6 𝗮 𝗯𝗼𝗺𝗯:

Ram pahnih boruak a sosang tial tial a, US chêtlak hnu hian Israel millitary lam report danin Israel chuan Iran airport 6 a bomb a. An ballistic missile chhêkkhawlna hmun a bomb chhe nual bawk.

𝗜𝘀𝗿𝗮𝗲𝗹 𝘀𝗽𝘆 𝗮𝗻 𝗸𝗵𝗮𝗶𝗵𝗹𝘂𝗺:

Vawiin hian Iran judiciary thutluknain Israel intelligence tana thawk nia rinhlelh Mohammad-Amin Mahdavi Shayesteh chu an khailum tih Iran-in judiciary chuan an puang.

𝗨𝗡 𝗦𝗲𝗰𝘂𝗿𝗶𝘁𝘆 𝗖𝗼𝘂𝗻𝗰𝗶𝗹 𝗺𝗲𝗲𝘁𝗶𝗻𝗴 𝗮𝗻 𝗻𝗴𝗲̂𝗻:

US-in Iran nuclear hmun pawimawh pathum ngawt a tihchhiat avangin Iran ambassador to the United Nations chuan 'emergency Security Council meeting' nei vat turin a ngên.

𝗡𝗼𝗿𝘁𝗵 𝗞𝗼𝗿𝗲𝗮 & 𝗖𝗵𝗶𝗻𝗮-𝗶𝗻 𝗨𝗦 𝗮𝗻 𝗱𝗲𝗺, 𝘁𝗵𝗹𝗮𝘄𝗽𝘁𝘂 𝗮𝗻 𝗽𝘂𝗻𝗴:

US-in UN Charter bawhchhiain Iran a bei a ni, tiin North Korea chuan an dem thu an puang a. Middle-East buaina thlentu tiin Israel pawh an dem hle a. US hian UN Charter nasa taka bawhchhiaa Iran a bei hi kan dem takzet, North Korea foreign ministry chuan an ti.

China foreign ministry pawhin US a dem hle tih puangin, Middle East-ah a bik takin Israel te chu inkahhai nei vat turin an ngiat.

Hetihlai hian UK, Australia, Ukraine leh Japan te chuan US hmalakna chu an thlawp thu an puang a. European Union pawhin Iran chuan nuclear ralthuam a neih a thiang lo tih an sawi nawn leh a ni.

Israel Prime Minister Benjamin Netanyahu chuan an tum an hlen ṭep tawh tih a sawi a, hlenchhuak law law turin hun erawh a la duh deuh hlek dawn a ti. Iran missile leh nuclear hmun tihchhiat nual a ni tawh a, hei aia thui, ram ṭhendarh leh chhuhsak lam chu an tum a nih loh thuba sawi.

(𝚂𝚘𝚞𝚛𝚌𝚎 𝚑𝚒 𝚔𝚑𝚊𝚠𝚝𝚑𝚕𝚊𝚗𝚐 𝚖𝚎𝚍𝚒𝚊 𝚕𝚎𝚑 𝙼𝚒𝚍𝚍𝚕𝚎 𝙴𝚊𝚜𝚝 𝚛𝚎𝚙𝚘𝚛𝚝 𝚊ṭ𝚊𝚗𝚐𝚊 𝚕𝚊𝚔 𝚔𝚑𝚊𝚠𝚖 𝚊 𝚗𝚒 𝚎)

Belhna:

Ziah hmaih tlêm ka nei a, ka finfiah mumal theih loh vang a nia.

Israel hian Iran-in US a bumah a puh deuh a, Fordow leihnuaia Uranium an tihchak (enriched) tawh te kg 400 kha a rûkin US bomb hma kha  hmun dangah an sawn vek niin an sawi, hei hi 60% aṭanga 90% vela enriched a nih an ring. Chuti a nih chuan nuclear warheads siamna atana hman tlak a ni dawn tihna a nia.