KAN KHUA LEH CHAPCHAR KUT
- Lalrintluanga Khiangte
( Kumin erawh rilru ti sirhe tu a va mak ve mawle tih tur a tam tak em avang hian, kumin chu “Ka Kut ve lo mai teh ang...” tiin tlang kan kawm ange.)
LUNGLEI 24.2.25: ORGANSING COMMITTEE: Mizoten hmanlai kan Pi leh pu te hunlai atanga an lo hman thin, Chapchar Kut chu kan hma lawk thlathar March ni 7 hian kan hmang leh dawn ta a. Kan Kristian nun dan zemawi tak kalsan silova, Mizo Kristian te Kut pui pawimawh tak kan hmanna ah hian, kan Kristianna nen a in chaltauh zawng ni lo, a in churem thlawp zawnga kan kalpui tak avang pawh hian thil lawmawm tak a ni a, hei hi i sim lovang u. Chutih lai erawh chuan Chapchar Kut lo thlenna turin chawlhkar hnih pawh tling mang tawh lo, chawlhkar khat tha erawh awrh emaw chauh a awm tawh a, kan in buatsaih dan te, Organising Comtt. kalphung leh ka hmuh dan te, thil fel tawklo awma ka hriat dan te ngaihtuah ho in i tarlang teh ang u. Kumin Chapchar Kut Lunglei khawpui a hman turah hian, a tir lama Organising Comtt. a tel, a hnua an paih emaw, meeting tura an koh ve tak loh te an awm nual a, a bik in, Kut ti hlung ber tu-a ngaih Zaimi pawl, MZI te leh chumi an pui a ding MDM kan tih tepawh chutiang zingah chuan an tel a, an hrethiam lo viau ni pawhin a lang. An ni pawl lo pawh sawi tur an awm nual bawk e.
A CHAWPCHILH THIN: Kumtin Chapchar Kut kan hmang thin a, chu chu March thla chawlhkar hmasaber a, Zirtawpni hmasaber a ni thin. Chu chu Mizoram Calendar Official Calendar ti pawh a sawi theih ah chiang takin a chuang kalh a, kumthar tir te atangin Chapchar Kut hi engtikah nge kan hman dawn tih kan hre vek mai. Chutiang a Ni bik nei a nih avang chuan inbuatsaihna hun pawh hi thawl takin a tam thei tur a ni a, mahse a chawpchilh in hun a tepter em em zel lawisi a, helai tak hi kan mutan lian tak pakhat chu zu ni tlat a mawle! Engvangin nge chutianga Mizoram Calendar-ah pawh chiang taka inziak, Holiday List-a awm, a sen a inziak kalh, Mizoram Calendar a rawn chhuah rual rual, kumhlui December thla atanga kan lo hmuh daih tawh si, bichilh taka kan hman thin leh hun chep tak kara organising comtt. kan din chuk chuk thin hi tih ziaawm theih ni se a duhawm hle bawk.
MIPUI IN KAN HLUT TELH TELH: Chapchar Kut hi hun engemaw lai atang khan kan hlut ta hle mai a, muala lawm tura kal a, kan mizo thuam han inbel te chu kan ching in, kan ngaihlu thar ta hle mai a, muala kal ve lo tepawhin, hemi ni hian mizo thuam an inbel a, chutiang zelin, chapchar kut dawn chawlhkar ah te chuan kan sorkar office, pisa hrang hrang ah te chuan, office staff ten mizo thuam inbel in, kut an urlawk thin a, hei hi pawh hi kan hlut hle niin a lang a, thil lawmawm tak a ni.
KAN CHIRI DEUH EM NI: Chutiang anih lai reng leh, kan ngaihpawimawh em em lai a, pheikhai rual lo deuh a ngaih theih Organising comtt. lama a awm ta tlat mai hi thil pawi tak niin alang. Kuminah hian kan Lunglei khawpui bikah Chapchar Kut Organising Comtt. kalphung a dikhlel deuh leh thil felhlel a tam ber trum ti ila kan sawi sual awm love. NGO hrang hrang ah te, a khaipa ber a kan ngaih, engtik lai pawh a kan puipa YMA Sub. Hqrs. lamah te leh NGO dang dang ah tepawh, a tira Organising Comt. a tel si, a hnua ban leh tak, phun ri leh engemaw in thiamlohna ni awm taka a hnu a telh leh si tih te thuthang a tam hle mai a, hei hi thil pawi tak niin a lang.
ka sawi ve thin dan: Chapchar Kut hi kan zavai a ta a ni a, Sorkar-in Holiday ah a puang a, chu chu chawlh a ni satliah lova, Chapchar Kut hlim taka lawm a hmang turin min duh a, sorkar officer leh hnahthawk tepawh in mual lama kal ngei turin kan rilru kan siam tur a ni ang. Chu chu sorkar thuawihna a ni a, a Mizo in a Kristian zawk em em a ni. Chapchar Kut a hnatlang koh te, Blanket su tura Lui lama liam duah duah te hi, a Mizo lova mualah kan kal kher thei vek lo a nih pawhin, in lamah awm in, Mizo nihna ah support kan inpe ve ngei ngei turah kei chuan ka ngai. Chuvangin hetiang ni khua a Blanket suk hnatlang kan la ko fo te hi sim a hun tawh a, Mizo min nih tirtu min siamtu duh dan pawh a ni lovang a tih theih hial zawk a ni. Chutiang khawp a nih avang zawk chuan Organising Comtt. puipa leh thunei tute hian, a pawimawhna hria a, huapzo thei ang ber leh a lungrual thei ang ber tura kalpui hram hram kan tum a ngai ang. Chapchar Kut hi hlimna Kut pui a ni a, chumi anih ang ngei chuan vuivai theihna lam thil te, vuivai tura insiam te chu he kut nen hian a in hmeh lova, chutiang ti emaw, chutiang pawh pawisa lem lo, thuneihna kan chan avanga midang ngaih pawimawh na nei lem lo kan nih chuan kan ti sual viau anga, he kut hi a hlawhchham let der thei tih pawh hre thar ila a duhawm hle in a rinawm.
TLAI KHAWHNU: A tira Orgn. Comtt-a telh, a hnua paih leh tak, pawl lian tak tak te chu meeting hnuhnung ber tura ngaih, Feb. 28 meeting ah telh leh vek tura koh leh an ni awm e. Thil kalphungah chuan last meeting chu engkim tihfel sa, ennawn na ang lek a ni tlangpui. Zai zawng zawng pawh House Band in an rem sak dawn a, zai tur emaw, lam tur emaw, item engemaw a telh thar leh tur chuan chawlhkar 1 pawh awm tawh lovang a ngaihna awm kher lovang.
ORGANISING SKILL: Kan Sorkar Officer te zingah hian thluak nei tha leh thil han organise thiam tak tak an awn ve tho laiin, zep nak emaw, thenkhat hi chuan organising skill an neihloh mai bakah a kawnghmang an hre lem lova, an tui vak lemlo mai thei. Kumtin a, nikum lama kan tih dan zul zui in ti-a minute hlui keu keu ringawt hi, a pawimawhna chen awm mahse, a hun tawh lova, chu chuan mipui hipna lam a kawk lo fo a, prog. tharlam mipui en chak zawng a awm thei lova, a fuh lo thin a ni. Chuvangin kan prog. siam hian mipui a hip tur a ni a, kal chakawm leh phurawm takin mipui a siam tur a ni. Chumi tur chuan sawi tawh angin hun neih tam a ngai a, bakah thil thar, kan Mizo thil ennawm tur ngaihtuah chhuah thiam a ngai a, Organising Comtt. kalphung a fuh a ngai bawk.
MZI & MDM : Zaimi te huangchhunga pawl lian tak pahnih MZI leh MDM te chuan, an mi leh sa te an zai dawn lo tih an sawi a, a chhan vang pawh news lamah kan hmu chuai chuai tawh. Zaimi te thlavang hauhna lam leh an hmalam hun thlir sak an nih avangin a awm viau maithei. Kan zaithiam ten Rs 3000 bawr vel an hlawh laia khaw dang atanga sawm ten Rs 50000 vel lawih an hlawh thin erawh lungdam a har. A inthlauh dan hi sum tlem karah a namailo lutuk tlat. Khaw dang zaithiam tel lova kut ve thei kan ni lo ami le a tih theih awm e. Zaithiam leh lar lamah chuan nasa taka inthlau pawh ni se, kan local zaithiam te hi kan duhsak in, kan chawimawi thin turah kei chuan ka ngai. An lawmman pawh tlema inthlau deuh chu ni se tupawn an hrethiam ang, a let khat mai ni lo, a let li, a let nga dawn laia lawmman inthlau hi a fel lo. Leitlangpui Festival ah tawn hriat duhawm lo tak kan nei tawh. Chapchar Kut hi Concert anga manto ta tak tak zaithiam te sawmna hun a nih dawn chuan hei hi kalphung nghet ah kan nei anga, kan local zaithiam te tan hmun a awm ngai lovang.
A KAIKUANG CHU LE: Kumin anga Organising Comtt. kalphung leh thil tih dan fuh lo leh intih vuivai na nasa lutuk hi khachen ka lo tel ve tawhna ah hian ka hre meuh lo. Hetah hian kan sawi vek seng lova, sawilan vek pawh tul ka ti lemlo. Sorkar Official lam atangin dik tawklo a awm nge, an chunglam atanga thu zawk, nawrtu an awm tih pawh ngaihtuah tham tak a ni. Anih loh vek pawhin Orgasing Commt. thuneitu zingah, mahni duhdan leh tha tih dan anga kalpui mai an awm em tih pawh zawhna pawimawh tak a ni a. Sum lama kan harsat thin zia, a ba vek a kan kal thin dan te hi ti danglam a, kalphung thar sorkar ah hmuh theih a hmasawnna hmuh a hnek a, a inti vuivai zawng leh a hnungtawlh zawnga kan kutpui a, a sirhe zawnga kan thlek pui tlat mai hi tunge a kaikuang ni ang le...???
KA KUT VE LO MAI TEH ANG: Chapchar Kut kan hman thinah hian hlung tak leh nuam taka kan Lunglei khawpui kan hman ka duh ve thin avangin, a theihna zawngah tan ka la nasa ve thin khawp mai a, District dangte aia kanmawiloh bik ka hlau ve thin. Kumin erawh rilru ti sirhe tu a va mak ve mawle tih tur a tam tak em avang hian, kumin chu “Ka Kut ve lo mai teh ang...” tiin tlang kan kawm ange.
